АҞӘА, ԥхынгәы 19 – Sputnik. Атроллеибустә маршрутқәа руак ҩымчыбжьоуп аус амуеижьҭеит, аха автобус ала анеира алшоит ҳәа Sputnik иазеиҭеиҳәеит Аҟәатәи автотранспорттә наплакы адиректор Леонид Шәлымба.
Афымцамчтә кабель аԥырхага ахьаиуз инадҳәаланы Аџьармыкьа-Алашарбага амаршрут ҩымчыбжьоуп аус амуеижьҭеи.
"Атроллеибус ацынхәрас аҟәатәи АТП автобусқәа хәба амаршрут Аџьармыкьа-Учхоз амаҵ руеит. Дара рмаршрут Владислав Арӡынба имемориал аҟынӡагь иҩаргоит. Аус руеит асааҭ 19:30 - 20:00 рҟынӡа. Арахьтәи аган ахь амаршруттә таксиқәагьы аус руеит", - иҳәоит иара.
Шәлымба иажәақәа рыла апассаџьырцәа рзы уадаҩра ыҟаӡам. 20-20 минуҭ рыбжьаны аангыларҭақәа ирԥырҵуеит автобусқәа. Иара убри аан атроллеибусқәа рыхәԥса амаҷра тәылауаак рзы еиҳа аманшәалара аман.
Апроблема аӡбра хара имгакәа иӡбахоит ҳәа иҳәоит адиректор. Шәлымба иара убасгьы иазгәеиҭоит автобустә маршрут ҿыц (Аџьырмыкьа-Ажәытә ҳабла) аусура ишалаго.
"Ақалақь аҿы ауааԥсыра рымаҵ руеит 20 автобус. Урҭ рҟынтәи 18 ҿыцуп", - иҳәоит иара.
Аԥсны асоциал-економикатә ҿиараз Аинвестициатә программа аҳәаақәа ирҭагӡаны Аԥсны иаанахәеит 62 автобус. Урҭ рҟынтәи 18 аҳҭнықалақь иаиуит.
Иара убас шәаԥхьар ҟалоит:
- Аԥсны араионқәа транспорт ҿыцла еиқәдыршәеит
-
Иури Барганџьиа атроллеибус амаршрут ҿыц иазкны: ауаа аргәырӷьеит
