АҞӘА, ԥхынгәы 26 – Sputnik. Ԥхынгәы 26 рзы имҩаԥысыз Алхратә комиссиа хада алахәылацәа реиҳараҩык аӡбра рыдыркылеит Асҭамур Какалиа, Асҭамур Оҭырба, Артур Анқәаб Аԥсны ахадаразы кандидатцәас ашәҟәы иҭагалазарц. Абри атәы Sputnik иазааицҳаит Аԥсны алхратә комиссиа ахантәаҩы Ҭамаз Гогьиа.
Иара иажәақәа рыла иҟан АКХ алахәылацәа арҭ ахаҿқәа ашәҟәы рҭагалара зынӡа иақәшаҳаҭмыз.
"Ҳара уаанӡагьы анапынҵамҭақәа гәыҩбара ҳарҭомызт. Азакәан ишаҳәо ала арыцхәқәагьы знапы анызҵо ахаҿы инапала иарбазароуп. Иара убри аан асанкциақәа ирыҵаркуа анапынҵамҭақәа роуп. Ажәакала, бжьеиҳала иӡбан арҭ ахҩык ашәҟәы иҭагалазарц", - иҳәеит иара.
АКХ аилатәараан иара убасгьы иалацәажәан аефир аамҭа аиуразы аҵәҭаԥсара азҵаарагьы. Уи адагьы иахәаԥшын Иорданиа инхо аԥсуа диаспора ахаҭарнакцәа рааԥхьара.
"Азакәанԥҵара иалнаршом иахьатәи аамҭазы Иорданиа абжьыҭирақәа рымҩаԥгара. Ҳара аҭакс ираҳҳәеит абжьыҭира ара ма Сҭампыл ирзалыршозар, гәахәара дуны ишаабо", - иҳәоит Гогьиа.
Иахьатәи аамҭазы атәыла ахадаразы еиндаҭлоит жәаҩык: Рауль Ҳаџьымба, Леонид Ӡаԥшьба, Алхас Кәыҵниа, Шамил Аӡынба, Олег Аршба, Алмас Џьапуа, Асҭамур Ҭарба, Асҭамур Какалиа, Асҭамур Оҭырба, Артур Анқәаб.
Иара убас шәаԥхьар ҟалоит:
- Аԥсны атәыла ахада иалхрақәа: аҽазыҟаҵарақәеи, аԥсахрақәеи
-
Аҩбатәи аетап: алхратә комиссиа аусурақәа ирыцнаҵоит
