Аҟәа, ԥхынҷкәын 16 - Sputnik. Аԥсны ахада Рауль Ҳаџьымба Аԥсны апрокуратура хада аилазаара дыдирдырит апрокурор хада ҿыц Адгәыр Агрба ҳәа аанацҳауеит аусбарҭа асаит аҿы.
Апарламент адепутатцәа маӡалатәи абжьыҭирала Аԥсны ахада Рауль Ҳаџьымба Аԥсны Жәлар Реизарахь Аԥсны Апрокурор хадас иҟаларазы ԥхынҷкәын 5 рзы инаишьҭыз Адгәыр Агрба икандидатура адгылара арҭеит ԥхынҷкәын 12 рзы имҩаԥысуаз аилатәараҟны.
Агрба икандидатура адгылара арҭеит 25-ҩык адепутатцәа, иаҿагылеит - 6-ҩык.
Абри аҭыԥ аҿы Адгәыр Агрба диԥсахит Зураб Ачба. Зураб Ачба имаҵураҟынтә ихы дақәиҭтәын ԥхынҷкәын 2 рзы.
Ԥхынҷкәын 2 рзы Ахақәиҭра ашҭаҿы еизеит 300-ҩык инарзынаԥшуа абҵара 22 рзы иршьыз Алхас Аҩӡбеи Асҭамыр Шамбеи рыуацәеи рҭынхацәеи, атәыла ауааԥсыра. Еизаз Аҩнуҵҟатәи аусқәа рминистр иамхра дҵас иҟарҵеит. Абри ашьҭахь дара Апарламент ахыбрахь инеит.
Иҟаз аҭагылазаашьа инадҳәаланы Гарри Аршба имаҵура дамхын. Иара убас рмаҵурақәа ирымырхит Аҩнуҵҟатәи аусқәа рминистр актәи ихаҭыԥуаҩ Казбек Кишмахов, Апрокурор хада Зураб Ачба, уи ихаҭыԥуаҩ Ешсоу Какалиа.
Ԥхынҷкәын 4 рзы Аԥсны Аҩныҵҟатәи аусқәа рминистрс дҟаҵан Раули Смыр.
Аԥсны ахада Рауль Ҳаџьымба Аԥсны Жәлар реизарахь ԥхынҷкәын 5 рзы инаишьҭит Аԥсны Апрокурор хадас иҟаларазы Адгәыр Агрба икандидатура.
Адгәыр Агрба диит ажьырныҳәа 15, 1981 шықәса рзы. 2005 шықәса рзы ААУ, аҭоурых-зиндырратә факультет далгеит. 2002 шықәса раахыс азинхьчаратә усбарҭақәа рҿы аус иуеит. Ԥхынҷкәын 8, 2015 шықәса раахыс иара арратә прокурорс дыҟоуп.
Аицҵақәа рҭыԥ аԥсахра аицҵалыҵ ианыԥшуам, ма митингла акадрқәа шаҳԥсахуа
2014 шықәса раахыс Адгәыр Агрба аԥшьбатәи кандидатуп прокурор хадас иҟазааразы.
Апрокурор хада имаҵура дарҭар, ма дамырхыр алшоит Аԥсны Жәлар Реизара адепутатцәа- Апарламент ахада иҟаиҵо ажәалагала инақәыршәаны.
Уи акандидатура иахәҭоу абжьқәа рхыԥхьаӡара имоур, ахада аусурамшқәа 30 рыҩнуҵҟа даҽа кандидатурак рыдигалароуп.
Иара убас шәаԥхьар ҟалоит:
- Рауль Ҳаџьымба Апрокурор хада икандидатура Апарламент иадигалеит
- Кәарҷиа Аԥсны Апрокурор хадеи Аҩнуҵҟатәи аусқәа рминистри рыԥхьатәаразы: шьҭахьҟа ҳагеит
