Аԥсны Ацентртә алхратә комиссиа Жәлар Реизарахь инанашьҭит атәыла алхратә закәан аԥсахрақәа ралагаларазы анацҳамҭа.
"Иахьатәи аамҭазы алхратә комиссиа иаанашьҭыз азҵаарақәа ҳрыхәаԥшит, уа ҩажәаҟа ыҟоуп, аха урҭ зегьы рыԥсахра аамҭа рацәа аҭахуп. Ҳара ҳаԥхьаҟа ишьҭоу алхрақәа ҳрыхәаԥшны, аимак-аиҿак зауз алкааны, урҭ аԥсахрақәа ралагалара ҳгәы иҭоуп, ауаа еилыркаартә еиԥш, алхратә комиссиагьы еилнакаартә еиԥш. Раԥхьа инаргыланы уи 19-тәи ахәҭаҷ ауп. Џьоукы аҩбатәи тур аан иаиааиз даиааит, аиҳа игеит ҳәа далкааны далхыз ҳәа ажәалагала ҟарҵеит, аха уи иақәшаҳаҭым рацәоуп. Сара иҟасҵаз ажәалагалақәа ртәы уҳәозар, актәи атур еиԥш аҩбатәигьы цар ауеит ҳәа сгәы иаанагоит. Актәи атур аҿы 50% бжьык ацны изауз аиааира игеит ҳәа иарбоуп, аҩбатәи атур аҿгьы уи апринцип ааныжьтәуп, аха алхрақәа мҩаԥысит ҳәа иԥхьаӡахоит 25% ауааԥсыра рыбжьы арҭазар. Урҭ рахьынтә абжеираҳак, 50% бжьык нацны абжьқәа игазар, даиааироуп ҳәа сгәы иаанагоит. Иаиааиз ауаҩы ибӷа ӷәӷәазароуп, ажәлар идгылазароуп, ус ианыҟамла, аус ииууа ԥсыҽхоит ҳәа сгәы иаанагоит", - ҳәа еиҭеиҳәеит Гәниа.
Инеиҵыху аиҿцәажәара шәазыӡырҩы арадио Sputnik Аԥсны аефир аҿы.
