АҞӘА, хәажәкыра 2 - Sputnik. Леонид Ӡаԥшьба иалхратә штабқәа русура аамҭала иааныркылоит ахадарахьы акандидат Аслан Бжьаниа иаалырҟьаны ахәышәтәырҭа дахьҭашәаз инамаданы.
"Ахадарахьы акандидат Аслан Бжьаниа иаалырҟьаны ахәышәтәырҭа дахьҭашәаз инамаданы ахадарахьы акандидат Леонид Ӡаԥшьба иштабқәа аамҭала русуреи алхыҩцәа рԥаларақәеи ааныркылоит. Леонид Иури-иԥа Аслан Бжьаниа изеиӷьеишьоит иаарласны игәабзиара шьақәгыланы алхратә кампаниа иациҵарц", - ҳәа Sputnik акорреспондент изеиҭалҳәеит АИХи ауаажәларреи рымдаразы Леонид Ӡаԥшьба ицхырааҩ Ельза Ҷанԥҳа.
Уаанӡа аштабқәа русура шааныркыло рҳәахьа акандидат Адгәыр Арӡынба ипресс-маҵзураҟны.
Аԥсны ахадарахьы акандидат Аслан Бжьаниаиаалырҟьаны Шәачатәи ахәышәтәырҭа дҭашәеит хәажәкыра 2 рзы.
Иара иштаб аҟны изларҳәаз ала, Шәачантәи Аԥсныҟа амҩа дшықәыз иҭагылазаашьа бааԥсхеит.
Аԥсны ахада инапынҵақәа назыгӡо Валери Бганба Ашәарҭадаратә хеилак алахәылацәа дырԥылеит абри аҭагылазаашьа инамаданы. Аҩнуҵҟатәи аусқәа рминистр иажәақәа рыла, Апрокурор хадас дҵас ирҭеит Бжьаниа иаалырҟьаны ахәышәтәырҭа иҭашәара аҭагылазаашьақәа еиикаарц.
