АҞӘА, хәажәкыра 30 - Sputnik. Аҟәа ақалақь аҳақьым хада Алла Белиаева арадио Sputnik аинтервиу аҭо илҳәеит ареспублика аҩнуҵҟа коронавирус аламырҵәаразы иҟаҵатәу.
"Ихадароу – изхымԥатәу уск ыҟамкәа аҩнқәа идәылымҵлароуп. Адәқьан ма аԥҭекахь анеира ада аныҟәарақәа мап рыцәктәуп", - ҳәа азгәалҭеит лара.
Аҩны шәандәылҵуа асабрада шәҿашәҵароуп ҳәа лҳәеит Белиаева.
"Асабрадақәа раахәара уадаҩуп, аха уи ҳара ҳҟны адагьы зехьынџьара ипроблемоуп. Асабрада ухаҭагьы иуӡахыр ҟалоит, иуадаҩӡам", - лҳәеит лара.
Адәқьанқәа рҿы знык ала ишәарҭарам ҳәа иԥхьаӡоу ауаа рхыԥхьаӡара ҩнарыжьло иалагеит.
"Ари зыҟаҳҵо ауааԥсыра ршәарҭадаразоуп. Ахәаахәҭырҭа аҩналара иазыԥшу еилагыламзароуп, метраки-метраки бжаки рыбжьазароуп", - ҳәа азгәалҭеит Белиаева.
Аҩныҟа шәаныхынҳәлак ишәымӷаз зныктәи ахархәара асабрада акәзар, икажьтәуп, акырынтә рхы иадырхәо акәзар, иӡәӡәаны иуанҭатәуп.
"Шәҿы шәнапы сапынла ишәыӡәӡәала. Адәқьан аҟынтәи иаажәго атауар акы илаҳәазар, аспирт злоу аӡшьар ала ирыцқьатәуп. Асабрада уҿы, уԥынҵа аҵәахуазароуп. Аҩны шәаннеилак шәшьаҵа шәышьышәхыроуп. Аҩналарҭаҿы ахлор злоу аӡшьар ала ирбааӡоу шәшьапы злышәшьуа ашьапрыцқьагақәа шьҭаҵатәуп. Аҩны шәаныҩналалак, шәеимаақәа шәыԥсахроуп", - ҳәа еиҭалҳәеит аҳақьым.
Белиаева лажәақәа рыла, зегь реиҳа ихадароу аҩны адәылымҵроуп. Уи агәабзиарахьчара асистемагьы иахәоит, ауаҩы ихаҭагьы.
"Ҳара ҳҿы макьана авирус змоу ҳәа уаҩ дазгәаҭам. Абасеиԥш даҽа 14 мшы ҳазнеир аԥкырақәа аԥыххар ҟалоит", - лҳәеит лара.
Аҳәаанырцәынтә иаауа аҩны рҽыҩнаркроуп, асанитартә маҵзурахьы аҭел иасны рхы ддырдырроуп (+7840 226 10 46; +7840 226 44 02).
Белиаева иазгәалҭеит иацижьҭеи Ԥсоуи Егри рҳәаақәа шарку.
Аԥсны иахьаҵанакуа хәажәкыра 28 инаркны мшаԥы 20 рҟынӡа аҭагылазаашьа ҷыда алагалоуп акоронавирус аламырҵәаразы. Ауааԥсыра ирабжьгоуп аҩны идәылымҵырц.
Ԥсоуи Егри рҳәаақәа аркуп, иахрыжьуам атәымтәылауаа, атәылауаҩра змам ахаҿқәа.
Аԥсны акоронавирус аҽацәыхьчаразы иҟоу аҭагылазаашьа атәы шәаԥхьар ҟалоит абра>>
