АҞӘА, лаҵара 5 - Sputnik. Аҟәатәи асасааирҭаҿы акарантин рхыргоит шәҩык инарзынаԥшуа аҳәаанырцәынтә иааз ҳтәылауаа ҳәа аарыцҳауеит Ауааԥсыра акоронавирус рацәыхьчаразы аоперативтә штаб аҟны.
"Аԥсны еиҿкаауп акоронавирустә инфекциа ахьыҟоу атәылақәа рҟынтәи иааз акарантин ахьырхыргаша аҭыԥқәа. Иахьазы аҟәатәи асасааирҭа "Аиҭар" аҿы акарантин рхыргоит 111-ҩык ҳтәылауаа", - рҳәеит аоперативтә штаб аҿы.
Ииасыз уахыки-ҽнаки рыла Аԥсны авирус агәаҭаразы атестқәа ирхысит ԥшьҩык. Урҭ рахьтә аӡәгьы ачымазара идбалам.
Аԥсны апандемиа аамҭазы акоронавирус рыдбалан хҩык ауааԥсыра. Ҩыџьа гәдоуҭатәи ахәышәтәырҭаҟынтә ргәы бзиаханы илҩаан, ахԥатәи - 1925 шықәса рзы ииз аԥҳәыс бырг лыԥсҭазаара далҵит. Иахьазы ачымазара змоу уаҩ дыҟам.
Ииасыз амчыбжь азы ауааԥсыра акоронавирус рацәыхьчаразы акоординациатә штаб алахәыла Алхас Џьынџьал Урыстәыла аҵара зҵо акурсантцәа уантәи Аԥсныҟа иааит иҳәеит. Ихынҳәыз раԥхьатәи акурсантцәа атәыла иалало рҽахьыԥхьаркуа асасааирҭа "Аиҭар" ахь инашьҭуп, аҳақьымцәа рхылаԥшуеит ҳәа азгәеиҭеит.
Акарантин анынҵәо атестқәа ирхыжьны рыҩныҟақәа рахь иоурыжьуеит.
Акоронавирус иазку ажәабжьқәа зегьы шәрыԥхьар ҟалоит абра>>
