АҞӘА, лаҵара 28 – Sputnik. Апроект "Аԥсныаалыҵекспорт" аусушьа еиӷьзар акәын ҳәа иҳәеит Аԥсуа телехәаԥшраҿы апресс-конференциа мҩаԥызгоз Аԥсны ақыҭанхамҩа аминистр и.н. Амиран Какалиа.
"Аԥсныаалыҵекспорт" иҳамоу аинформациала ауааԥсыра ақыҭанхамҩатә аалыҵ рымхәҳаны Урыстәылеи егьырҭ атәылақәеи рахь аекспорт иашьҭлароуп", - иҳәеит Какалиа.
"Аԥсныаалыҵекспорт", "Аԥсныцха" реиԥш иҟоу аобиектқәа ишахәҭоу еиԥш аус руӡом, избанзар ас иҟоу аобиектқәа акраамҭатәии имариоуи акредиттә дгылара рҭахуп.
"Усеиԥш аԥара ҳара иҳамам. Ауааԥсыра атауар рымхәҳаразы еснагь ԥарала ҳмаџьаноуп. Арҭ аобиектқәа ршьапы иқәыргылатәуп. Уи азы аԥаратә хархәагақәа ҳаԥшаароуп", - иҳәеит Какалиа.
Ареспубликатә унитартә наплакы "Аԥсныаалыҵекспорт" аԥҵан 2017 шықәса рзы. Анаплакы ашәыри ауҭраҭыхи рыҵәахырҭа амоуп Агәыӡера. Иара ргылан Аԥсны асоциал-економикатә ҿиаразы Акомплекстә план инақәыршәаны. Иахшәаан 118 миллион мааҭ. Азеиԥш ҭбааҭыцәра - 1 404 метр ԥшьыркца ыҟоуп, 2500-2700 тонна аалыҵ акуеит. 2019 шықәсазы арахь иааган 500 тонна.
АУН "Аԥсныцха" акәзаргьы, Аԥсны асоциал-економикатә ҿиараз Акомплекстә план инақәыршәаны иргылан. Анаплакы аминистрра абаланс ахь ирыдыркылеит 2019 шықәса рзы. Асметатә хәыԥса - 41 миллион мааҭ.
Иара убас шәаԥхьар ҟалоит:
-
Аԥсны ақыҭанхамҩа аминистрра ахәаҷамаҷа рҿагыларазы 117 миллион мааҭ азоужьуп
-
Какалиа: анхацәа рымхқәа амалаҳәа рыцәаӷәара ҳазыхиам, аха иахьынӡауа ахә рмаҷхоит
