Аԥсны иааиԥмырҟьаӡакәа инхо, мамзаргьы аамҭала Аԥсны иҟоу Урыстәыла атәылауаа рыбжьы арҭар ҟалоит Ацҳаражәҳәарҭа ахыбраҿы асааҭ 20:00 рҟынӡа.
Урыстәыла Аконституциахь аиҭакрақәа ралагаларазы абжьыҭара иаҿуп алхырҭатә ҭыԥ №8000 ахьаарту Аԥсны иҟоу Урыстәылатәи Афедерациа Ацҳаражәҳәарҭаҿы.
Алхыҩцәа ацҳаражәҳәарҭа агәашә иадеизалахьан асааҭ ааба ҟалаанӡагьы.
Раԥхьаӡа зыбжьы азҭаз дыруаӡәкуп Очамчыра араион аҿы инхо Арминак Маделиан, иара шьыжьна ы Аҟәаҟа дааит, асааҭ быжьба раахижьҭеи агәаран дықәгылан.
"Хымԥада абжьыҭара аҭахуп, аԥсҭазаара бзиа ҟаларц азы, ԥхьаҟатәи ҳабиԥарақәа ҳара ҳаҵкыс еиӷьны инхарц азы", - иҳәеит иара.
Алхыҩцәа ражәақәа рыла, рыбжьы арҭаанӡа дара зны иҭырҵааит Аконституциахь иаларгаларц ргәы иҭоу аиҭакрақәа.
Аԥсны иҟоу Урыстәыла Ацҳаражәҳәарҭаҟны рыбжьы арҭар ҟалоит ԥхынгәы 1 асааҭ 20:00 рҟынӡа.
Урыстәыла Аконституциахь аиҭакрақәа ралагаларазы аҩаша, рашәара 30 рзы заанаҵ рыбжьы арҭеит Аԥсны ахада Аслан Бжьаниа, ахада ихаҭыԥуаҩ Бадра Гәынба, аԥыза-министр Александр Анқәаб.
Заанаҵ иара убас рыбжьы арҭеит Аԥсны иҟоу Урыстәылатәи арратә база аруааи атәыла Аҩнуҵҟатәи аусқәа рминистрра аусзуҩцәеи.
