АҞӘА, нанҳәа 4 - Sputnik. Урыстәыла Агәабзиарахьчара аминистрра аекспертцәа гәыԥҩык Аԥсны акоронавирустә чымазаҩцәа ахьырхәышәтәуа Гәдоуҭатәи ахәышәтәырҭа иаҭааит, апациентцәа арахь раагашьа шеиҿкаау гәарҭеит, азона "ҟаԥшь" еимырдеит, ахәшәқәеи ахыхьчагақәеи шаҟа иазхо рҳәеит ҳәа аанацҳауеит Урыстәыла Агәабзиарахьчара аминистрра асаит.
Уи адагьы урстәылатәи аспециалистцәа Аҟәатәи ацхыраара ласы астанциа аусушьа гәарҭеит, уи амашьынақәа роуп акоронавирус зцәа иалоу ачымазцәа назга-аазго, иара убас ахәыҷтәы поликлиника аусушьа шеҿкаау рбеит.
Аделегациа иалахәын ауааԥсыра амедицинатә цхыраара рзеиҿкаара азҵаарақәа ҳәаақәызҵо Урыстәыла агәабзиарахьчара аминистр лхаҭыԥуаҩ Оксана Гусева, Урыстәыла агәабзиарахьчара аминистрра Хырԥашьа змам ацхыраара аҭара адепартамент адиректор Инна Куликова, иара убас Краснодартәи атәылаҿацә агәабзиарахьчара аминистр ихаҭыԥуаҩ Ирина Виазовскаиа.
Нанҳәа 6 рзы урыстәылатәи аспециалистцәа-анџьнырцәа Гәдоуҭатәи ахәышәтәырҭа иазку акомпиутертә томограф шьақәдыргылоит, уи ахархәара иалагоит ҳәа азԥхьагәаҭоуп ҳазҭоу амза аҩбатәи азбжазы.
Иара убас шәаԥхьар ҟалоит:
- Аҳәаа аартреи Аԥсны агәабзиарахьчара аҭагылазаашьеи: Ҭамаз Ҵахнакьиа иҿцәажәара
