АҞӘА, ажьырныҳәа 18 - Sputnik. Атуроператор TUI Урыстәыла иазԥхьагәанаҭоит афирматә ҭаацәаратә концепциа FUN&SUN атәылақәа 9 рҿы 42 отель рҟны аусура раларгара, Аԥсынгьы абрахь иналаҵаны ҳәа аанацҳауеит Урыстәыла Атуроператорцәа рассоциациа Анацҳамҭа.
Раԥхьаӡа акәны ари аҩыза аҭаацәаратә концепциа Аԥсны лаҵарамзазы иӡыргахоит. Атуроператор иӡбамҭа адырҳәалоит аԥхынразы Аԥсны атуризм азы иаартхап ҳәа агәыӷра.
Ифирматәу "аҭырқәа" формат змоу ԥсшьарҭахараны иҟоуп х-еҵәак змоу аотель FUN&SUN "Жәкәара" (Гагра). Аотель амшын аԥшаҳәа актәи ацәаҳәаҿы игылоуп, иамоуп ахатәы плиаж, аԥқьаҭасырҭа, аҵакыра иаҵәара.
Гагра ақалақь ажәытә раиони аҿатә раиони ирыбжьакуп, аквапарк, аџьармыкьа, аресторанқәеи адәқьанқәеи ирзааигәоуп.
TUI аҿы ишырҳәо ала, аотель аконцепциа FUN&SUN ахь аиасра амаҵзурақәа рзырҳара адагьы рхаҭабзиарагьы еиӷьнатәуеит. Убас, 2021 шықәсазтәи асезон азы иазԥхьагәаҭоуп аҩбатәи акорпус аргылара, ирԥхоу аӡҭачы аартра.
Аԥснытәи аотель TUI асасцәа мышкахь хынтә акрырҿарҵоит. Иазԥхьагәаҭоуп ахәыҷқәа рзы амениу ҷыда, афатә еилызхуа рзы амениу.
4 - 12 шықәса зхыҵуа ахәыҷқәа рзы аотель аҿы иаартхоит ахәыҷтәы клуб "TUI Тукан", 3 шықәса рҟынӡа зхыҵуа ахәыҷқәеи урҭ ранацәеи рзы иаартхоит аҵакыра ҷыда, ахәмарырҭақәа.
Аклуб аҿы иҟалоит ахәмарга ҿыцқәа, арҿиаратә программақәа, агәмырҿыӷьгатә программақәа.
Атуроператор TUI Урыстәыла иазԥхьагәанаҭоит 2021 шықәсазы аҭаацәаратә концепциа FUN&SUN иаҵанакуа аотельқәа 42 раартра: Ҭырқәтәыла – 14, Кипр – 8, Черногориа – 1, Италиа – 1, Испаниа – 1, Бырзентәыла – 2, ОАЕ – 3, Урыстәыла – 2, Аԥсны – 1.
Арҭ апланқәа нагӡахоит еиқәыԥхьаӡоу атәылақәа урыстәылатәи атуристцәа рзы ишаартхо ала ҳәа аанацҳауеит аилахәыра апресс-маҵзура.
