АҞӘА, ԥхынгәы 1- Sputnik. Акоронавирус еиҭашьҭыркаауеит алаҵа ашьҭахь 2,5% ҳәа аанацҳауеит РИА Новости Урыстәыла аԥыза-министр ихаҭыԥуаҩ Татиана Голикова лажәақәа шьаҭас иааганы.
Ишиашо ицо аефир аҿы Владимир Путин иҳәеит алаҵа ҟазҵаз рҟынтәи жәа-процентк ачымазара еиҭашрыхьуа. Аԥыза-министр ихаҭыԥуаҩ Татиана Голикова арбага лыриашеит.
Амҩаԥгаҩ Екатерина Березовскаиа атәыла ахада диазҵааит "зыгәра гатәыда" ҳәа.
"Ҳәарада Татиана Алексеи-иԥҳа лыгәра гатәуп. Лара ари аус есыҽны лнапы алакуп, илҳәо лдыруеит, Агәабзиарахьчара аминистрс дыҟан", - иҳәеит уи аҭакс Путин.
Урыстәыла аепидемиологиатә ҭагылазаашьа еиҳа-еиҳа иуадаҩхоит, аиҳабыра ауааԥсыра рахь ааԥхьара ҟарҵоит активла алаҵа ҟарҵарц.
