АҞӘА, ԥхынгәы 2 - Sputnik. Шәачатәи аҳаиртә баӷәазаҿы алаҵаҟаҵарҭа аадыртит акоронавирус аҟынтәи. Аҳаиртә баӷәаза апассаџьырцәеи аусзуҩцәеи алшара рымоуп хәыда-ԥсада "Спутник V" рылаҵара ҳәа аанацҳауеит РИА Новости.
Алаҵа хәыда-ԥсадоуп, изҭаху зегьы иҟарҵар рылшоит. Актәи ахәҭа ҟазҵаз изы адыррақәа апортал "Госуслуги" аҿы ашәҟәынҵа иҭаргалоит, уа алаҵазы QR-код иоуеит.
"Алаҵаҟаҵаратә уада аартуп аҳаирбаӷәаза ахыбра ахԥатәи аихагылаҿы, аус ауеит асааҭ 10:00 инаркны 15:00 сааҭ рҟынӡа. Алаҵа ҟазҵо имазароуп Урыстәыла атәылауаҩшәҟәы, СНИЛС, аԥгаԥсатә полис", - аҳәоит адырраҭараҿы.
Алаҵаҟаҵарҭа анаадырт аԥхьатәи амш азы 44-ҩык алаҵа ҟарҵеит, урҭ рҟынтәи 36-ҩык аҳаиртә баӷәаза аусзуҩцәа роуп.
