АҞӘА, ԥхынгәы 6– Sputnik. Аԥсуа-ақырҭуа ҳәаа ахысразы иалагалаз аԥкрақәа еиҭарыхәаԥшны маҷк идырԥсыҽит ҳәа аанацҳауеит ГАЛ ТВ.
Ари аӡбара Гал араион инхо ауааԥсыра ачымазараҿкы аҟынтәи алаҵа аҭыԥан еиԥш, Қырҭтәылагьы аҟаҵаразы алшара рынаҭоит. Иара убас ахылаԥшра-аушьҭырҭатә ҭыԥ "Егры" аҟны иаартуп амедпункт, уаҟа алаҵа ҟаҵаны игьежьуа ауааԥсыра ашәҟәы иҭаргалалоит.
Аԥсуа-ақырҭуа ҳәаа аркын акоронавирустә инфекциа апандемиа ианалага инаркны ареспублика аҵакырахь ачымазара алалара алмыршаразы. Аԥкрақәа алагалоуижьҭеи аҳәааҿы агуманитартә коридор акырынтә иаадыртхьеит. 2020 шықәсазы хнызқьҩык инарзынаԥшуа Қырҭтәылантәи Аԥсныҟа ихынҳәит. Атәанчахәқәеи асоциалтә шәарақәеи зауа, амедицинатә цхыраара аиура зҭаху рзы аҳәаа ахысразы ԥкыра ыҟам.
