https://sputnik-abkhazia.info/20211201/abiaraa-reimadara-gagrati-akultura-anany-afototsyrgaa-aadyrtit-1036558440.html

Абиԥарақәа реимадара: Гагратәи акультура аҩнаҟны ацәыргақәҵа аадыртит

Абиԥарақәа реимадара: Гагратәи акультура аҩнаҟны ацәыргақәҵа аадыртит

Sputnik Аҧсны

Аԥсуа сахьаҭыхыҩцәа қәыԥшцәеи аиҳабыратә абиԥареи русумҭақәа рцәыргақәҵа аартуп Гагра. 01.12.2021, Sputnik Аҧсны

2021-12-01T21:45+0300

2021-12-01T21:45+0300

2021-12-01T22:50+0300

аԥсны

акультура

ауаажәларра

ажәабжьқәа

гагра араион

https://cdnn1.img.sputnik-abkhazia.info/img/07e5/0c/01/1036557345_0:135:2600:1598_1920x0_80_0_0_f88dd7798aab39dfce62d24b3b1ff4f3.jpg

Ԥхынҷкәынмза 8 рзы асахьаҭыхыҩцәа жәларбжьаратәи рымш азгәарҭоит. Гагра араион акультура аҟәша аиҳабы Мадина Бганԥҳаи акультура аҩны аиҳабыреи аӡын раԥхьатәи амш аҽны араион асахьаҭыхыҩцәа рцәыргақәҵа еиҿыркааит. "Иахьа ишыжәбо еиԥш апрофессионалтә сахьаҭыхыҩцәа рнапкымҭақәа рнаҩс араҟа ицәыргоуп аҿарацәа русумҭақәагьы. Абиԥарақәа реимадара иалнаршоит аԥышәа аизырҳара, еиҳау аҩаӡарахь агәазыҳәара. Иазгәасымҭарц залшом Гаграа рнаҩс ишалахәу егьырҭ араионқәа рхаҭарнакцәагьы", - иҳәеит Гагратәи акультура аҩны аиҳабы инапынҵақәа назыгӡо Дмитри Ԥиԥиа.Дмитри Ԥиԥиа иажәақәа рыла, дара ааигәа еиҿыркааит Нестор Лакобеи, Ефрем Ешбеи ргәалашәареи, Октиабртәи ареволиуциеи ирызку аекспозициеи. Гагра араион аҵара аҟәшеи дареи реимадара иабзоураны арҭ аусмҩаԥгатәқәа активла ирҭаауеит ашколхәыҷқәагьы.Ацәыргақәҵаҟны иӡырган Аԥсны асахьаҭыхыҩцәа Реидгыла алахәылаҩ, апрофессор Геннади Барцыц иусумҭақәа, абжьаратәи аҿартәи абиԥараҟнытә Анатоли Качалови, Татиана Саноиани, Акоп Агаханови, Сабина Лободеи, Анастасиа Белеичевеи, Валериа Багдаӡеи, Ремиз Аибеи, Наталиа Даниловеи, Асҭамыр Ешбеи, аскульптор Темыр Аҳәбеи рнапкымҭақәеи, иара убас Гагратәи аҟазаратә школ ааӡамҭацәеи, Гагратәи абжьаратә школ аҵаҩы Камилла Аивазовеи рсахьақәа.27 шықәса зхыҵуа, Аҟәатәи асахьаҭыхратә ҵараиурҭа аушьҭымҭа Анатоли Качалов ҷыдалатәи иусумҭақәа рцәыргақәҵақәа шеиҿикаахьоугьы, Гаграҟа иоуз ааԥхьара гәахәарыла идикылеит. Авторцәа гәыԥҩык злахәу ацәыргақәҵа иҟазара ганрацәала аизырҳараҿи иҿыцу адыррақәа рырҳареи рҿы ишцхыраагӡоу иҳәеит.Қәрала иқәыԥшу, аха знапкымҭақәа ажәлар ирылаҵәахьоу аскульптор Ҭемыр Аҳәба ацәыргақәҵаҿы ахәаԥшцәа ирыдигылеит ауаа рыскульптурақәа ԥшьба. Ҭемыр иажәақәа рыла, иара Аԥсны аҩнуҵҟа имҩаԥысуа ацәыргақәҵақәа есышықәса дрылахәуп, зынӡа инапы иҵыҵхьеит аусумҭақәа шәкы.Гагратәи акультура аҩны аусзуҩ, асахьаҭыхыҩ қәыԥш Татиана Саноиан лакәзаргьы, ари ацәыргақәҵахь илоуз ааԥхьара насыԥны илԥхьаӡоит."Аԥсны араионқәа жәпакы рҟынтә асахьаҭыхыҩцәа ҳахьеизаз, ҳахьеибадыраз даара акраҵанакуеит. Абиԥарақәа реиамадара иарбан усзаалак унапы злаку аҿы даара ицхыраагӡоуп. Сара хаҭалатәи сцәыргақәҵа ааԥынразы имҩаԥган. Урҿиара ҳаҭыр ақәызҵо ауаа анубалак ҭыԥк аҟны уаангылаӡом, есыҽны арҿыцрақәа рахь иухоит. Иахьагьы, асахьаҭыхыҩцәа аӡәи-аӡәи ахырхарҭа рацәа змоу ҳусумҭақәа ахьаҳбаз иаҳнарҵо рацәоуп. Абри аҩыза алшара ҳазҭаз зегьы иҭабуп ҳәа расҳәоит", - лҳәеит асахьаҭыхҩы.Акультура аҩнаҟны ицәырган 70 усумҭа инарзынаԥшуа. Авторцәа рсахьақәа иргәылубаауан аус аныруазтәи ргәалаҟазаареи рцәаныррақәеи. Хаҭала сара сыбла сызрыхгомызт Сабина Лобода иаалырԥшыз Афон ҿыцтәи асахьеи, Валериа Багдаӡе аус здылулаз Аҟәатәи аԥшаҳәа асахьеи.Иара убас ацәыргақәҵаҟны аҭааҩцәа ирбарц рылшон аԥсуеи аҳәаанырцәтәии еицырдыруа авторцәа, иаҳҳәозар Нугзар Логәуа, Илиа Репин, Ван Гог уҳәа рфотосахьақәагьы.Ацәыргақәҵа ԥхынҷкәын 10 нӡа иаартызауеит.

https://sputnik-abkhazia.info/20200216/sabarala-abakhatra-zlou-Tatiana-Sanoian-atsyrgaa-shylzeiyrkaaz-1029466065.html

гагра араион

2021

Ажәабжьқәа

ab_AB

акультура, ауаажәларра, ажәабжьқәа, гагра араион