Иахәҭоу аԥҟарақәа ирықәныҟәаны: РУСДРАМ аԥкрақәа рышьҭахь аусура хацнаркит
11:55 27.01.2022 (ирҿыцуп: 16:01 27.01.2022)
© Sputnik / Томас Тхайцук
Анапаҵаҩра
Аԥсны ауааԥсыра COVID-19 рацәыхьчаразы иалагалаз аԥкрақәа инарықәыршәаны 2021 шықәса нанҳәамзаахыс русура аанкылан акультура аусбарҭақәеи аспорттә хыбрақәеи. Ажьырныҳәа 25 рзы дара русура ахацыркразы азин рыҭан.
АҞӘА, ажьырныҳәа 27 – Sputnik, Наала Гәымԥҳа. Аԥкрақәа рышьҭахь Фазиль Искандер ихьӡ зху Аурыс драматә театр Федирико Гарсиа Лорка иҩымҭала ақәыргыламҭа "Радость вопреки всему" ала аусура хацныркит, ажьырныҳәа 26 азы.
РУСДРАМ аиҳабы Иракли Хынҭәба арадио Sputnik аинтервиу аҭо иҳәахьан, атеатр анапгхара ҭакԥхықәрала иахәҭоу асанитартә ԥҟарақәа ирықәныҟәаны рус ишазнеиуа.
"Ихацҳаркуеит ҳусура. Ари акыраамҭа ҳаззыԥшыз хҭысуп, даараӡа ҳаигәырӷьеит. Еилаҳкаауеит иҳаду аҭакԥхықәра. Ачымазара аҽацәыхьчаразы иахәҭоу аԥҟарақәа ҳрықәныҟәоит, асанитартә нормақәа зегьы ҳрызхьаԥшоит. Агәра ганы ҳаҟоуп ахәаԥшцәа ахдырра шаадырԥшуала. Абри аганахь ала атеатр ҿырԥшыганы иҟалароуп зегьы рзы. Ҳара ҳаигәырӷьоит апандемиа аамҭазыҳәаны акультура ахәшҭаарақәа ахьеиқәхаз, рыԥсы ахьҭоу, аус ахьыруа. Ари жәларбжьаратәи ԥышәоуп",- иҳәеит иара.
Атеатр актриса Ирина Делԥҳа лажәақәа рыла, ҩаԥхьа асценахь рцәырҵра даара гәахәарыла ирыдыркылеит, ныҳәак ирзаҩызахеит:
"Ҽнакымзар ҽнак ҳәа агәыӷра ҳаман, уажәы уашьҭан ҳтеатр аатуеит ҳәа. Акыраамҭа ҳшазыԥшыз, абар иахьа алшара ҳауит ҩаԥхьа асценахь ҳцәырҵыртә еиԥш. Бзиа иаҳбоз ҳусура ҳанаҟәыгаха ауп еиҳагьы уи ахь иҳамаз абзиабара ҳныруа ианалага", - ҳәа лцәаныррақәа мӡакәа илҳәоит лара.
"Радость вопреки всему" аспектакль ахәаԥшцәа дырбаразы ихиан мызқәак раԥхьа, аха ҳтәылаҿы иалагалаз аԥкрақәа ирыхҟьаны ахәаԥшцәа рахь ацәыргара залмыршакәа иҟан.
РУСДРАМ аԥкрақәа рышьҭахь аусура хацнаркит
© Sputnik / Томас Тхайцук
"Радость вопреки всему"- ари Федерико Гарсиа Лорка иԥсҭазаареи ирҿиареи зныԥшуа қәыргыламҭоуп.
"Иахьа иҟалеит ҳазқәымгәыӷӡоз ахҭыс ду. Ҳгәы хыҭ-хыҭуа ҳазыԥшын, иаҳбаз аспектакль агәалаҟазаара бзиа ҳзааннажьит", - ҳәа лҳәеит ахәаԥшҩы Наала Сақаниаԥҳа.
Атеатр уахьааҩналоз ахәаԥшцәа ирыдыргалон асабрадақәа рнапқәа арзҩыдаразы ирабжьаргон. Атеатр аиҳабы Иракли Хынҭәба ахәаԥшцәа бзиала шәаабеит ҳәа раҳәо, хаҭала рҭыԥқәа рахь имҩахигон. Асанитартә нормақәа ирықәшәо зегьы еиҿкаан: ахәаԥшцәа ирхан асабрадақэа, ирыбжьан иахәҭоу асоциалтә бжьаӡара.
РУСДРАМ аԥкрақәа рышьҭахь аусура хацнаркит
© Sputnik / Томас Тхайцук
Фазиль Искандер ихьӡ зху Аурыс драматә театр Федирико Гарсиа Лорка иҩымҭала ақәыргыламҭа режиссиорс дамоуп Мариа Романова. Ақәыргыламҭа ахықәкқәа ируакуп Лорка иажәеинраалақәа рыла иҩнуҵҟатәи адунеи, ихаҭара заку аарԥшра, атеатр аҭоурых аиҭаҳәара. Асценаҟны адекарациақәа маҷын, ахәаԥшцәеи актиорцәеи еилаҵәон, асцена аханы икнаҳан Лорка ифотосахьақәа, актиорцәа ҟазарыла иаадырԥшуан аҟазара иаҵоу ахьааи ауадаҩрақәеи. Аспектакль испаниатәи апоет иԥсҭазаарахь ухьазырԥшуа акакәны иҟалеит. Аԥсуа театрқәа Лорка иҩымҭақәа ирылхны акымкәа-ҩбамкәа аспектакльқәа ықәдыргылахьеит. Уи ала иуҳҳәар алшоит Лорка ирҿиамҭа аԥсуаа ирзаагәоуп ҳәа.
Аԥсны ауааԥсыра COVID-19 рацәыхьчаразы иалагалаз аԥкрақәа инарықәыршәаны 2021 шықәса нанҳәамзаахыс русура аанкылан акультура аусбарҭақәеи аспорттә хыбрақәеи. Ажьырныҳәа 25 рзы дара русура ахацыркразы азин рыҭан.
РУСДРАМ аԥкрақәа рышьҭахь аусура хацнаркит
© Sputnik / Томас Тхайцук
