https://sputnik-abkhazia.info/20220130/aterroristtsa-ragylarazy-aa-asua-aurys-azyaaraa-shymaysyz-1037355348.html

Атеррористцәа рҿагыларазы: Аҟәа аԥсуа-аурыс ҽазыҟаҵарақәа шымҩаԥысыз

Атеррористцәа рҿагыларазы: Аҟәа аԥсуа-аурыс ҽазыҟаҵарақәа шымҩаԥысыз

Sputnik Аҧсны

Аԥсны амчратә усбарҭақәеи Урыстәыла Афедералтә шәарҭадаратә маҵзуреи русзуҩцәа аҽазыҟаҵарақәа еицымҩаԥыргеит Аҟәа амҽыша ажьырныҳәа 30 рзы. 30.01.2022, Sputnik Аҧсны

2022-01-30T16:25+0300

2022-01-30T16:25+0300

2022-01-30T17:01+0300

аԥсны

ажәабжьқәа

https://cdnn1.img.sputnik-abkhazia.info/img/07e6/01/1c/1037327648_0:73:1400:861_1920x0_80_0_0_26c28e91ef9ab8b3b0ccd9fe26c25218.jpg

Аҽазыҟаҵарақәа рысценари ала, "атеррористцәа" аиҳабыратә хыбрақәа ааныркылеит, ауааԥсыра шасыс иргеит. Аԥсны АШәМ, ААР, АҶА, Урыстәыла АШәМ русзуҩцәа атеррористцәа ықәырган, ашасцәа рхы иақәиҭыртәит. Рхы иадырхәеит акәылӡтәытранспортиорқәа, аробот, иазыҟаҵаз алақәа.Бадри Есиава, SputnikАхыбраҿы ашасцәеи илҵшәадахаз аиҿцәажәарақәеиАҽазыҟаҵарақәа рылагамҭазы 1992-1993 шш. раан иблыз Аминистрцәа рхеилак (Совмин) ахыбра аҿаԥхьа еизеит атәыла аиҳабыра, амчратә усбарҭақәа рнапхгаҩцәа, ақалақь ауааԥсыра. Асабрадақәа зҿаз, иахәҭоу маҭәала еилаҳәаз ауаа рҭыԥқәа ааныркылеит ахыбра азааигәара, инаԥшы-ааԥшуан, аҭагылазаашьа зеиԥшраз ахәшьара арҭон, наҟ-наҟтәи ашьаҿақәа рыҽрыздырхион.Ус излахәоз ала иццакны Совмин иаадгылт Минивенк, уи инҭҟьеит гәыԥҩык ауаа. Ихысуа мацара ахыбра иҩналеит, аҩнуҵҟагьы ԥыҭк ихысит. Аоперациа ахьымҩаԥысуаз аҭыԥ ахь инеит ҩ-кәылӡтәытранспортиорк, дара аҩналарҭа хада иахылаԥшуан. Иҷыдоу азыҟаҵара змоу агәыԥ атехника рҽавакны игылан, равтоматқәа аԥенџьырқәа рахь ирханы.Аҩналарҭа аԥхьа игылаз амашьына ҭырҵааит ароботи акинологцәеи - уа бомба ҳәа акгьы рымбазт, инаскьаганы ҽаџьара идыргылеит.Аиҿцәажәарақәа мҩаԥызгашаз ауаҩы даарыԥхьеит. Иара инапқәа шьҭыхны ахыбра дыҩналеит, минуҭқәак уа дыҟан, аха аиҿцәажәарақәа лҵшәа шырмоуз еилкаахеит атеррористцәа аԥенџьырқәа рҟынтәи ахысра ианалага. Анаҩс аоперациа аҩбатәи ахәҭахьы ииасит.Аҳауаҟынтәи ажәылараАбри аамҭазы авертолиот абжьы ааҩуа иалагеит. Иара аиҳабыраа рыҩны ахыб аҟынӡа ианнеи, аҳауаҿы аҽааннакылеит, уантәи икылԥаз ажәыларатә гәыԥ ахыб иқәԥалеит. Нас ашахақәа рыла ахыбра адәахьтәи аҭыӡқәа рыла илбааны атеррористцәа ахьыҟаз аихагылаҟынӡа инеин аԥенџьырқәа ԥҽны иҩналеит, аиҿахысра иалагеит. Рус нарыгӡарц азы ижәылоз амчратә усзуҩцәа секундқәак роуп ирҭаххаз.Ус иааҭынчрахеит, аха иаарласны еилкаахеит атеррористцәа зегьы рықәхра шрылымшаз. Дара ахыбра егьырҭ аихагылақәа рҟны рҽырҵәахызаап. Убри азы ҩаԥхьа авертолиот иаԥхьеит.Уи хынҳәны иаанӡа ҷыдала иазыҟаҵаз агәыԥ ашасцәа дәылыргеит. Атеррористцәа урҭ рыҽрыладырӡҩазар еилыркаар акәын.МИ-8 ҩаԥхьа ажәҩан аҿы иаацәырҵит, уажәы иара адгьыл аҽазааигәаны илаҟәит, асаба ӷәӷәаны ишьҭнахит. Аҽазыҟаҵарақәа ирыхәаԥшуаз шьоукы аҵлақәа рыҽрывакны рҽырҵәахыр акәхеит.Авертолиот иақәтәаз уажәшьҭа имшәакәа атеррористцәа ахьыҩназ аганахь апулемиотқәа рыла ихысуа иалагеит, анаҩс, иӷәӷәаны тҟәацбжьык геит. Абас ала, аҳаирмчқәа ари аоперациа хдыркәшеит.Алҵшәақәеи арҽхәаԥхьыӡқәеиЛҵшәа бзиала ихыркәшаз аоперациа ашьҭахь, уи иалахәыз амчратә усзуҩцәа зегьы рнапхгаҩцәа рҿаԥхьа ацәаҳәа иқәгылеит. Аԥсны Аҳәынҭқарратә шәарҭадаратә маҵзура ахантәаҩы Роберт Киут урҭ иҭабуп ҳәа реиҳәеит русуразы, иирҽхәеит иаадырԥшыз апрофессионализм азы, ақәҿиарақәа рзеиӷьеишьеит.Киут иажәақәа рыла, Урыстәылатәи рколлегацәа алархәны арҭ рҩызцәа аҽазыҟаҵара дуқәа раԥхьаӡа акәны ишымҩаԥысуа.Киут инаҵшьны иазгәеиҭеит арҭ рҩызцәа аҽазыҟаҵарақәа наҟ-наҟгьы ишымҩаԥыргало. Урҭ ирыбзоураны аԥсны амчратә усбарҭақәа зегьы русеицура еиҳа алҵшәа аиулоит. Уажәы урҭ ирылахәын Аԥсны АШәМ, ААР, АҶА, Агәабзиарахьчара аминистрра, иара убас Урыстәыла АШәМ русзуҩцәа.Аԥсны АШәМ ахантәаҩы аҽазыҟаҵарақәа "бзиан" ҳәа ахәшьара риҭеит, агәрагарагьы ааирԥшит ҳаԥхьаҟагьы иҵегьы иҟарҵаша, ирҵаша шыҟоу. Иара убас иазгәеиҭеит раԥхьаҟа иҟалараны иҟоу аҽазыҟаҵарақәа еиҳа рымҽхак шыҭбаахо. Урҭ ашьхареи амшын аҿы ишымҩаԥыргало. Аԥсны Атәылахьчара аминистррагьы урҭ ирылахәхар шрылшо иҳәеит.Роберт Киут иажәақәа рыла, арҭ аҽазыҟаҵарақәа рымҩаԥгаразы Аҳәынҭқарратә шәарҭадаратә маҵзура абиуџьет аҟынтәи аԥара азоужьын.

https://sputnik-abkhazia.info/20220128/1037332657.html

2022

Ажәабжьқәа

ab_AB

ажәабжьқәа