Аҟәа иӡырган адокументалтә фильм ҿыц "Аԥсуа ашәа"
10:25 17.05.2022 (ирҿыцуп: 12:06 17.05.2022)
© SputnikПресс-показ фильма об абхазской народной песне в рамках проекта "Амазара" от ВААК
![Пресс-показ фильма об абхазской народной песне в рамках проекта Амазара от ВААК Пресс-показ фильма об абхазской народной песне в рамках проекта Амазара от ВААК - Sputnik Аҧсны, 1920, 17.05.2022](https://cdnn1.img.sputnik-abkhazia.info/img/07e6/05/10/1039126112_0:107:1137:747_1920x0_80_0_0_549df12f8e754ddbc4c80a6496c236b3.jpg)
© Sputnik
Анапаҵаҩра
Апроект хықәкыс иамоуп аԥсуа-абаза жәлар рдоуҳатә-культуратә ҭынха аиқәырхара, жәлар рашәақәа рыхьчара, аҿар агәыблра дыркра.
АҞӘА, лаҵара 17 – Sputnik, Наала Гәымба. Адунеизегьтәи аԥсуа-абаза конгресси ИАЕ "Алашареи" рыпроект "Амазара" аҳәаақәа ирҭагӡаны иаԥҵоу аԥсуа ашәақәа ирызку адокументалтә фильм ҿыц ӡырган лаҵарамза 16, АААК апресс-зал аҟны.
Адокументалтә фильм аӡыргара мҩаԥысит Аԥсны АИХқәеи, ҷыдала иааԥхьаз асасцәеи, афильм аҭыхра иалахәызи рзы.
Афильм аҟны иаарԥшуп ажәлар рашәақәа фба: Агарашәа, Ахәрашәа, Аџьа ашәа, Аҭацаагарашәа, Ӡиуоу, Анцәа рашәа.
© SputnikАдунеизегьтәи аԥсуа-абаза конгресси ИАЕ "Алашареи" рыпроект "Амазара" аҳәаақәа ирҭагӡаны иаԥҵоу адокументалтә фильм ҿыц "Аԥсуа ашәа" аӡыргара
![Пресс-показ фильма об абхазской народной песне в рамках проекта Амазара от ВААК Пресс-показ фильма об абхазской народной песне в рамках проекта Амазара от ВААК - Sputnik Аҧсны, 1920, 16.05.2022](https://cdnn1.img.sputnik-abkhazia.info/img/07e6/05/10/1039126110_0:0:1239:929_1920x0_80_0_0_476a1d2df6fa329226c205cee8cc3443.jpg)
Адунеизегьтәи аԥсуа-абаза конгресси ИАЕ "Алашареи" рыпроект "Амазара" аҳәаақәа ирҭагӡаны иаԥҵоу адокументалтә фильм ҿыц "Аԥсуа ашәа" аӡыргара
© Sputnik
Афильм арежиссиор, асценарист Аԥсны зҽаԥсазтәыз артист, Самсон Ҷанба ихьӡ зху Аԥсуа драматә театр арежиссиор Мадина Аргәынԥҳа, апродиусер АААК Аҳәса рхеилакқәа рнапхгаҩы Гета Арӡынԥҳа, аоператор Наала Аҩӡԥҳа, акомпозитор Ҭемыр Агрба.
Афильм алагоит аныҟәаҩ дызнысуа амҩала. Раԥхьа иаҳбоит уи амшын аԥшаҳәаҟнытәи лныҟәарақәа, анаҩс уи лныҟәарақәа хыркәшахоит ашьхараҿ. Аԥсуашәақәа зызку, ианырҳәо, ишырҳәо атәы уеиллыркаауеит афильм аҟны иаарԥшу аныҟәаҩ лыбзоурала. Амҩа дықәнаҵы ажәлар рашәақәа акакала дырзааҭгылоит. Афильм аҟна иаагоу ажәлар рашәақәа нарыгӡоит Гәдоуҭатәи ахор "Ахьышьҭра". Аныҟәаҩ лроль налыгӡеит Нина Наҷҟьебиаԥҳа.
Афильм еиҭагоуп хә-бызшәак рахь - абаза, аурыс, араб, аҭырқәа, англыз бызшәақәа рахь.
Сааҭыбжак ицоз афильм даара азҿлымҳара аҵан. Иуаҳауаз аԥсуа ажәытә ашәақәа угәаҵанӡа инеиртә иҟан. Афильм абжьы ахеиҵеит Аԥсны зҽаԥсазтәыз артист Роман Сабуа.
Аԥсуа драматә театр арежиссиор Мадина Аргәынԥҳа лажәақәа рыла, ас еиԥш иҟоу ахшыҩҵак анлыдыргала гәахәарыла илыдылкылеит, иара убас инаҵшьны иазгәалҭеит апроек анагӡараҿ ауадаҩрақәагьы шацыз атәы.
"Аҿыц аидеиа еснагь адгылара асҭоит, сазҿлымҳауп. Ари апроект ансыдыргыла, мап ацәысымкӡеит. Уи иабзоураны срабадырит аҟаза дуцәа, раԥхьа инаргыланы, гәдоуҭатәи ахор "Ахьышьҭра" ашәаҳәаҩцәа. Афильм ҭыхны ҳалгеит 2019 шықәса анҵәамҭазы, аха апандемиа чымазара иахҟьаны иахьанӡа иахыго иааҳгон", - ҳәа лҳәеит лара.
Афильм апродиусер АААК Аҳәса рхеилакқәа рнапхгаҩы Гета Арӡынԥҳа афильм ахҳәаа ҟаҵо илҳәеит, арежиссиор ишлылшаз аиҿкааратә гәыԥ ргәы иҭаз анагӡара, иазгәалҭеит хазы азнеишьа аҭаны дшаԥылаз ари апроект.
"Ҳара ҳусеицура ҩаԥхьа иҳеилныркааит аԥсуа жәлар рдоуҳа ԥсра-ӡра шақәым. Иҟанаҵы ас еиԥш иҟоу аԥсуа цәа ӡырызго афильмқәа, агәыӷра ҳамоуп ҳҵас-ҳқьабз атәым милаҭқәа еиҳа ирылаҵәап ҳәа", - лҳәеит лара.
© SputnikАдунеизегьтәи аԥсуа-абаза конгресси ИАЕ "Алашареи" рыпроект "Амазара" аҳәаақәа ирҭагӡаны иаԥҵоу адокументалтә фильм ҿыц "Аԥсуа ашәа" аӡыргара
![Пресс-показ фильма об абхазской народной песне в рамках проекта Амазара от ВААК Пресс-показ фильма об абхазской народной песне в рамках проекта Амазара от ВААК - Sputnik Аҧсны, 1920, 16.05.2022](https://cdnn1.img.sputnik-abkhazia.info/img/07e6/05/10/1039126107_0:0:1130:848_1920x0_80_0_0_fdb689b8550576b0d4d68f8205e29cf2.jpg)
Адунеизегьтәи аԥсуа-абаза конгресси ИАЕ "Алашареи" рыпроект "Амазара" аҳәаақәа ирҭагӡаны иаԥҵоу адокументалтә фильм ҿыц "Аԥсуа ашәа" аӡыргара
© Sputnik
Ауаажәларратә усзуҩ Баҭал Кәабахьиа иазгәеиҭеит, адокументалтә фильм даараӡа ушархәыцуа, афилософиатә ҵакы шалукаауа џьара-џьара.
"Иҭабуп ҳәа расҳәоит апроект иазааԥсаз зегьы. Сгәаанагарала, ишәықәҿиеит, даараӡа исгәаԥхеит. Ҷыдала иалышәкааз аԥсуа шәақәа рызнеишьа ҵаулан. Аԥхьатәи аминуҭқәа рзыҳәаны исзеилымкаауашәа сгәы ишабазгьы, арежиссиор лҟазара амҩа уқәнаҵоит, зегьы еилукаауеит", - иҳәеит иара.
Аиԥылара хыркәшо Гәдоуҭатәи ахор "Ахьышьҭра" инарыгӡеит аԥсуа ашәа.
Адунеизегьтәи аԥсуа-абаза конгресси ИАЕ "Алашареи" рыпроект "Амазара" аԥсуа-абаза жәлар рдоуҳатә-культуратә ҭынха иазкуп. Аидеиа авторс дамоуп АААК Иреиҳаӡоу ахеилак ахантәаҩы Мусса Егзакь. Апроект хықәкыс иамоуп ҳажәлар рдоуҳатә-культуратә ҭынха аиқәырхареи аларҵәареи ҳаамҭазтәи аинтернет-технологиақәа рхархәарала. Уаанӡа ари апроект аҳәаақәа ирҭагӡаны ицәырган афильмқәа хԥа: аԥсуа кәашара иазку, аԥсуа жәлар рашәа иазку -"Нарҭаа рышьҭабжь", абаза ҳәызбақәа ирызку.