Арсалиаԥҳа Геннади Барцыц ицәыргақәҵазы: агәхьаагара аныԥшуеит
Арсалиаԥҳа Геннади Барцыц ицәыргақәҵазы: агәхьаагара аныԥшуеит
Анапаҵаҩра
Аҟәатәи ацәыргақәҵатә зал хадаҟны ажьырныҳәа 25 рзы иаатуеит Аԥсны Зҽасазтәыз асахьаҭыхҩы Геннади Барцыц ииубилеитә цәыргақәҵа. Аекспозициа аефир аҟны далацәажәеит Аҟәатәи ацәыргақәҵатә зал хада аиҳабы Ельвира Арсалиаԥҳа.
Аԥсны Зҽаԥсазтәыз асахьаҭыхҩы Геннади Барцыц 75 шықәса ихыҵра иазку ииубилеитә цәыргақәҵа еиднакылоит автор ирҿиаратә мҩа иалиааз 60 усумҭа инареиҳаны.
"Ари ацәыргақәҵа иҽазиҟаиҵоижьҭеи акрааҵуеит. Аекспозициа иаҵанакуеит сынтәа, ҵыԥх иҟаиҵаз мацара акәымкәа, егьырҭ ашықәсқәа рзгьы еиуеиԥшым ақалақьқәа, аҳәынҭқаррақәа рҟны дахьыҟаз, анырра изҭаз асиужетқәа. Ацәыргақәҵа уанаҭаауа иаразнак иубоит иҿыханҵатә гәалашәара. Сҭампыл, Москва, Аҟәа, еиуеиԥшым ақалақьқәа изаанрыжьыз ацәаныррақәа аҿыханҵаҟны иааирԥшит. Иазгәасҭар сҭахуп ацәыргақәҵаҟны Аԥсны иазку атема цәаҳәа ҟаԥшьны ишагәылсуа. Уи Владислав Арӡынба ипатреҭ аума, акультуратә баҟақәа ирызку атема аума, иҟоуп аусумҭа "Ахьачхәама". Ақәхьаагаратә ҟазшьа рымоуп иусумҭақәа, избанзар Геннади Шоҭа-иԥа иҟазара шықәсы рацәала Урыстәыла имҩаԥысуан", - лҳәеит Арсалиаԥҳа.
