Аахыҵ Уаԥстәыла имҩаԥгахоит Аԥсны акультура амшқәа
© Sputnik / Марианна Кубрава
Анапаҵаҩра
Ашықәс нҵәаанӡа Аахыҵ Уаԥстәыла акультура амшқәа Аԥсны имҩаԥгахараны иҟоуп.
АҞӘА, хәажәкыра 23 - Sputnik. Мшаԥымза 4 - 7 рзы Аахыҵ Уаԥстәыла имҩаԥысраны иҟоуп Аԥсны акультура амшқәа ҳәа аанацҳауеит Акультура аминистрра апресс-маҵзура.
"Ари ҳатрадициақәа, ҳҭоурых, ҳкультура азнагаразы зеиӷьаҟам лшароуп. Ҳара аҩганктәи акультуратә уснагӡатәқәа рымҩаԥгаразы ҳаиқәшаҳаҭхахьан, абар сынтәа уи зегьы анагӡара ҳгәы иҭоуп. Мшаԥымза 4 -7 рзы ҳара Аԥсны акультура амшқәа мҩаԥаагоит, анаҩс аҭак аҳасабала Аԥсны имҩаԥысуеит Аахыҵ Уаԥстәыла акультура Амшқәа", - ҳәа азгәеиҭеит Аԥсны акультура аминистр Даур Ақаҩба.
Ақаҩба иара убас аиашьаратә республикақәа рыбжьара акультуратә еимадареи агуманитартә диалоги рҳәаақәа рырҭбаараҿ Акультура амшқәа рҵакы инаҵшьны иазгәеиҭеит.
Аԥсны акультура амшқәа раартра иазку аныҳәатә усмҩаԥгатәқәа хацыркхоит мшаԥымза 5 рзы. К. Л. Хетагуров ихьӡ зху Аҳәынҭқарратә драматә театр аҟны. Ахәаԥшцәа идырбахоит Аԥсны Аҳәынҭқарратә аҿар ртеатр инарыгӡо Аԥсны жәлар рышәҟәыҩҩы Шьалодиа Аџьынџьал иажәабжьқәа рмотивқәа рыла иқәыргылоу аспектакль "Аибашьра ахԥатәи амш".
Мшаԥымза 6 рзы Аԥсны зҽаԥсазтәыз жәлар рыкәашареи рышәаҳәареи рзы аҳәынҭқарратә ансамбли аԥсуа естрада артистцәеи рықәгылара азгәаҭоуп.
