Аԥсны Апарламент аԥстәқәа рызныҟәашьаз азакәан апроект иахәаԥшоит
© Sputnik / Томас Тхайцук
Анапаҵаҩра
Апарламент аҳәынҭқарра-зинтә политиказ аилак аилатәара мҩаԥган хәажәкыра 30 рзы.
АҞӘА, хәажәкыра 31 - Sputnik. Аԥсны Апарламент иааиуа аилатәарақәа рыҟны "Аԥстәқәа рызныҟәашьаз" азакәан апроект иахәаԥшоит.
Адокумент иазԥхьагәанаҭоит:
аԥстәқәа разыҟазаашьаан азеиԥш ԥҟарақәа рықәныҟәара;
аҳәынҭқарратә ҭышәныртәалареи азеиԥш хылаԥшреи;
аҩны аԥстәқәа рымазаара аҭагылазаашьаз аҭахрақәа;
аԥстәқәа рыԥшәмацәа рҭакԥхықәрақәа;
аԥстәқәа мҽыӷрыла рызныҟәара аҟынтә рыхьчара;
ихуаадоу аԥстәқәа разыҟазаашьа;
абнатәи аекзотикатәи ԥстәқәа афото рыцҭыхра аиҿкаареи амҩаԥгареи азинҟамҵара;
акультуратә, агәмырҿыӷьратә, аӡыргаратә, амаҵзуратә хықәкқәа рзы аԥстәқәа рхархәараз аҭаххарақәа;
амаҵзуратә хықәкқәа рзи амаҵзуратә ԥстәқәеи рхархәараз аҽазыҟаҵарақәа рзы аҭаххарақәа;
алабораториатә ԥстәқәа разыҟазаашьаан аҭаххарақәа;
ихуаадоу аԥстәқәа рышьра азинҟамҵара;
аԥстәқәа рхатәтәразы аԥкрақәеи азинҟамҵереи;
аԥстәқәа рзы аанкыларҭақәа русура;
аԥстәқәа рышьразы аԥкрақәа.
Акыр зҵазкуа акакәны иҟоуп - амҩа иану иаԥшәымадоу алақәеи ацыгәқәеи рхыԥхьаӡара аиҵатәразы амчрақәа рраҟәара мҩаԥыргаларц адҵаҟаҵара.
Аԥстәқәа азин иаҿагыло рзыҟазаашьазы ахараԥсақәа еиҳа иҳаракны рышьақәыргылара.
