Салаҟаиа: анхаҩы аџьабаа баны акгьы анимоулак, рыцҳара дууп
Салаҟаиа: анхаҩы аџьабаа баны акгьы анимоулак, рыцҳара дууп
Анапаҵаҩра
Ҭхьына ақыҭан инхо Анатоли Салаҟаиа арадио Sputnik аефир аҟны еиҭеиҳәеит сынтәа аџьықәреи аҽаҩра зеиԥшроу, иахьынӡафеидоу уи аарыхра атәы.
Сынтәа аарҩареи ахәаҷақәеи аџьықәреи аҽаҩра ԥырхага арҭеит, иҳәеит анхаҩы.
"Даара имаҷуп аҽаҩра аарҩара иахҟьаны, аха угәы каужьыр ауӡом. Иахьа иҟамлар, уаҵәы иауп. Сара хаҭала 5-6 нызқь метра роуп иласҵо. Ақыҭаҟны уҽаҩра анбзиаха, уца 40-50 калаҭ ҭоуԥсартә еиԥш иҟоуп, аха сынтәа даара ихьысҳауп. Издыруеит аҭаацәа гектарк лазҵаз. Аԥша аӡа ҿысхоит ҳәа дахьнеиз, акгьы ыҟаӡамызт, ахәаҷа ирфеит, аԥҳәцәҟьа изаамгаӡеит. "Уаҳа иласҵом!" иҳәеит, аха ус зегьы ҳгәы кажьны илаҳамҵо ҳалагар, иабантәиаагои? Урыстәылантәи иаарго ҳақәгәыӷыр иашаӡам. Унапалы иааурыхо агьама иаҳа ихаауп. Иахьа ақыҭанхамҩа арыӷьарахь имгьежьыр ада ԥсыхәа ыҟам. Аџьықәреи мацара аума, ауҭраҭых зегьы аҭахуп. Иара аԥсшьаҩцәа иаауа ирҿаҳҵои ? Анхаҩы аус иуеит, иҟаиҵо иҵаҳәатәуп. Иаҳҳәап, даҽа шәырк, уҭраҭыхк аарых, абааԥсы, уҳәар, иааирыхуеит, анхаҩы ицхраатәуп. Анхаҩы аџьабаа баны акгьы анимоулак, рыцҳара дууп", - иҳәеит Салаҟаиа.
Аицәажәара инеиҵыхны ишәаҳар шәылшоит аудиофаил аҟны хыхь.
