Аԥсны аҳаиртә закәанеидкыла актәи аԥхьарала аԥсахрақәа алагалоуп
13:56 22.12.2023 (ирҿыцуп: 14:23 22.12.2023)
© Sputnik / Томас Тхайцук
Анапаҵаҩра
Аԥсны аҳаиртә закәанеидкыла аусура иалагеит 2009 шықәса цәыббра 1 азы.
АҞӘА, ԥхынҷкәын 22 - Sputnik, Асмаҭ Ҵәыџьԥҳа. Аԥсны жәлар реизара адепутатцәа Аԥсны аҳаиртә закәанеидкыла актәи аԥхьарала аԥсахрақәа аларгалеит.
Апроект ахықәкы – аус зуа азакәанеидкыла анормақәа рыԥсахреи, аҳаиртә авиациа аусхк аҟны азинтә еизыҟазаашьақәа рҭышәныртәалара реиӷьтәреи роуп.
Апроект иазыԥхьагәанаҭоит:
азинмчнагӡа змоу аусбарҭақәа рҳәаақәҵара иадҳәало аилкаарақәа реиӷьтәра;
аусурахь рыдкылараани русураамҭеи рзи амедицинатә гәаҭара аҳаирусзуҩцәа аҟазауаа рахыжьразы аԥҟарақәа рышьақәыргылара, анаркотикатәи аԥсихотроптәи маҭәашьарқәа рцәа алазааразы атестқәа рымҩаԥгарагьы налаҵаны;
аграждантә авиациа аусхк аҟны азинмчнагӡа змоу аусбарҭа арҭ агәаҭарақәа рымҩаԥгара аԥҟара аҳәаақәҵараз амчлшара иҭара;
аграждантә авиациа аусхк аҟны азакәанԥҵара аҭахрақәа рықәымныҟәараан авиациатә еиҿкаара ма ахаланаплакҩы рганахь ала ахархәара зауыр алшо ауснагӡатәқәа рышьақәыргылара;
авиашәарҭадара аҭахрақәа еилазгаз, абагаж, аидара, аԥошьҭа рымҩангараан ззин ыҟам амаҭәарқәа уахь раларкра ҟазҵаз ахаҿқәа азинхьчаратә усбарҭақәа рыҭаразы арҭ аусбарҭақәа азинмчра рыҭара;
агәаҭаратә нормақәа реиӷьтәра;
аҳаиртә мҩангара азеиԥш ԥҟарақәа ирҿамгыло апассаџьырцәа рымаҵ аура еицәазымтәуа ахатә ԥҟарақәа амҩангаҩ иҭара;
амҩангаратә документқәа аелектронтә формала реиҿкаараз алшара аҟаҵара;
азинмчнагӡа змоу аусбарҭа амаҵзурақәеи аизгақәеи ртарифқәа рышьақәыргылареи урҭ рылхра аԥҟаррақәа реиҭакреи рзин аҭара;
апассаџьыр аԥырра мап ацәкреи, иԥарақәа издырхынҳәырц ази изин ашьаҭақәа рырҭбаара;
апассаџьыр имаҭәа, ибагаж рыӡра, рыԥхасҭатәра рзы амҩангаҩ иҭакԥхықәра ашьақәыргылара.
Аҟәатәи аҳаирбаӷәаза аиҭашьақәыргыларазы аиқәшаҳаҭра анапы аҵаҩын 2023 шықәса рашәара 16 рзы. Аиқәшаҳаҭра ранпы аҵарҩит Кристина Озгани Максим Решетникови, Санкт-Петербург.
Аслан Бжьаниа иазгәеиҭахьеит аҳаирбаӷәаза 2024 шықәса ԥхынҷкәын 31 азы аусура иалагоит жәларбжьаратәи аҭагылазаашьа еибамырххар ҳәа.
