https://sputnik-abkhazia.info/20250131/rakhati-aiformatsiat-mazura-asnypress-30-shysa-akhyit---1053559113.html

Раԥхьатәи аинформациатә маҵзура: "Аԥсныпресс" 30 шықәса ахыҵит

Раԥхьатәи аинформациатә маҵзура: "Аԥсныпресс" 30 шықәса ахыҵит

Sputnik Аҧсны

30 шықәса раԥхьа, ажьырныҳәа 31 1995 шықәсазы Аԥсны ахада Владислав Арӡынба иусԥҟала иаԥҵан Аҳәынҭқарратә информациатә маҵзура "Аԥсныпресс". 31.01.2025, Sputnik Аҧсны

2025-01-31T10:55+0300

2025-01-31T10:55+0300

2025-01-31T13:37+0300

аԥсны

ажәабжьқәа

аԥсны

https://cdnn1.img.sputnik-abkhazia.info/img/07e9/01/1d/1053528706_0:160:3072:1888_1920x0_80_0_0_ec6360450872588bed50eb176b0c108f.jpg

2021 шықәсазы иаԥҵан аҳәынҭқарратә усбарҭа "Аԥснымедиа", уахь иаҵанакуеит аинформациатә маҵзура "Аԥсныпресс", ареспубликатә газеҭқәа "Аԥсны", "Республика Абхазия".Амаҵзура анаԥҵаз, изхысыз аамҭақәа, аредакциа иахьатәи аусушьа Sputnik аматериал аҟны.Бадраҟ Аҩӡба, SputnikАмаҵзура аԥҵара шыҟалазАҳәынҭқарратә информациатә маҵзура "Аԥсныпресс" (раԥхьа "Абхазпресс" ҳәа захьӡыз - аред. азгәаҭа) аԥҵан аинформациеи акьыԥхьи рминистрра ашьаҭала. Аԥсны Аџьынџьтәылатә еибашьра анеилга ашьҭахь, 1993 шықәса ԥхынҷкәынмзазы еиҿкаан аинформациеи акьыԥхьи рминистррагь уахь иназлаз аиҳабыра ҿыц реилазаара. 1994 шықәса абҵарамзазы атәыла ахадара аинститут анаԥҵаха ашьҭахь, аиҳабыра реилазаареи уи аиҿкаареи рҽырыԥсахит – аинформациеи акьыԥхьи рминистрра ықәганы аинформациатә маҵзура аԥҵаразы аӡбара рыдыркылеит. "Аинформациатә маҵзура дуқәа рҟынтәи ажурналистцәа аинтерес ду аадырԥшуа иалагеит, убри аҟнытә иҳаӡбеит урҭ аус рыцызуа аусбарҭа ҳҭахуп ҳәа, уи аамҭазы иахьынӡазалшоз атәылаҿы имҩаԥысуаз ахҭысқәа иаарласны ирызнагатәын. Иаҳа азхьаԥшра аҭан аиҿцәажәарақәа рымҩаԥысшьа, ақырҭуа-аԥсуа еизыҟазаашьақәа, аҳәаахьчаратә ҭыԥқәа рҿы иҟоу аҭагылазаашьа рзы", - ҳәа азгәалҭеит лара.Аусбарҭа раԥхьатәи аусзуҩцәа 16-ҩык рыла ишьақәгылан, урҭ реиҳараҩык уаанӡа аинформациеи акьыԥхьи рминистрраҿы аус руан. Манана Гәыргәлиаԥҳа аинформациатә маҵзурахьы аусура дааит 1995 шықәсазы. Аусура далагеит "Абхазпресс" раԥхьатәи аиҳабы Беслан Гәырџьуа ихаҭыԥуаҩыс данааиԥхьа."Шықәсқәак рышьҭахь, аусбарҭа ахьӡ ԥсахын "Аԥсныпресс" ҳәа, избан акәзар Владислав Григори-иԥа Арӡынба иӡбеит аусбарҭа ахьӡ аԥсышәала еиуеиԥшым аҳәынҭқаррақәа ираҳаларц. Раԥхьатәи ажәалагала "Аԥсныжәабжь" ҳәа иҟан, аха урысшәала рацәак атранскрипциа маншәаламызт азы иахьатәи ахьӡ аҟны иаангылеит", - ҳәа илгәалалыршәоит аредактор хада."Аԥсныпресс" азы иуадаҩыз аамҭа Раԥхьатәи аамҭақәа рзы "Аԥсныпресс" аусура акадрқәеи афинансқәеи рганахьала иуадаҩын. Аредакциа зегьы рзы компиутер заҵәык акәын иҟаз, уи аус алуур акәын аредакциа аусзуҩцәа аӡәы. "Ҳара аурыс бызшәеи аԥсуа бызшәеи рыла икьыԥхьоз ҩ-машьынак ҳаман, урҭ ирхагылаз Анжела Қәычбериаԥҳа лакәын, избанзар лара лакәын зегь раасҭа ирласны икьыԥхьоз. Ҳара афаксқәеи аҭелқәеи ҳхы иаҳархәон. Афаксла ажәабжь ашьҭра адагьы иҳадаҳкылон, анаҩс иахкьыԥхьааны иреиҳау амчратә усбарҭақәа – аҳәынҭқарра ахада, аԥыза-министр, апарламент аиҳабы ирзаҳшон", - ҳәа инаҵшьны иазгәалҭеит Манана Гәыргәлиаԥҳа.Уи аамҭазы аинформациатә маҵзура аусура еиҳарак иззырхаз Аԥсни Қырҭтәылеи реимак аӡбара апроцесс акәын, "Аԥсныпресс" ажурналистцәа абжьаҟазацәа злахәыз аиԥыларақәа зегьы ирҭаауан, урҭ рыхцәажәарагьы мҩаԥыргон. Аҵакы маҷмызт еиуеиԥшым атәылақәа рҟынтәи Аԥсныҟа иаауаз аҳәаанырцәтәи ажурналистцәа аинформациа рызнагара. "Ажурналистцәа Қырҭтәылантәи иаауан ҩымш-хымш, раԥхьа дара уа аматериалқәа ҟарҵон, аимак аҭагылазаашьз ргәаанагарақәа ҽакала ишьақәгылон. Ҳара хықәкыс иҳамаз ҳпозициа инақәыршәаны аинформациа рызнагара акәын, сара шәкыла аинтервиуқәа рысҭахьант", - ҳәа азгәалҭеит "Аԥсныпресс" аредактор хада.Аинтернет ацәырҵреи асаит аԥҵареи Аинформациатә маҵзура "Аԥсныпресс" раԥхьатәи асаит цәырҵит 2010 шықәсазы. Асаит аԥҵахаанӡа, аредакциа аусзуҩцәа русумҭақәа кьыԥхьны анапаҵаҩҩцәа ирызнаргон. Уи адагьы, аусбарҭа аматериалқәа аинформациатә порталқәа рҟны иркьыԥхьон."Раԥхьа 90-2000-тәи ашықәсқәа рзы ҳинформациа зхы иазырхәоз аҭыԥантәи аинформациатә хархәагақәа ракәын, еиҳарак аҳәынҭқарратә. Аха ихьыԥшым аҭыжьымҭақәагьы ҳинформациа рхы иадырхәон, ҳара иҳалшоз зегь ҟаҳҵон аинформациа аларҵәаразы. Ҳусзуҩцәа абжаҩык аштат анҭыҵтәиқәаны аус руан, анаҩс РИА Новости, ТАСС, егьырҭ аҭыжьымҭақәа аштатқәа рҟны корреспондентцәас", - ҳәа лҳәеит Манана Гәыргәлиаԥҳа.Иахьа аусбарҭа аматериалқәа атекст, афото, авидео аформатқәа рыла "Аԥсныпресс" асаит аҿы, асоциалтә еимадарақәа рҿы иаҳкьыԥхьоит. 2021 шықәсазы иаԥҵан аҳәынҭқарратә усбарҭа "Аԥснымедиа", уи иаҵанакуеит аинформациатә маҵзура "Аԥсныпресс", ареспубликатә газеҭқәа "Аԥсны", "Республика Абхазия"."Иахьазы амаҵзураҟны 12-ҩык аус руеит, еиҳа ахшыҩзышьҭра змоу атексттә материалқәа роуп. Ауаа сазҵаауеит, иахьа аҿар аматериал кьаҿқәа ианрыԥхьо аамҭазы аматериал дуқәа зышәкьыԥхьои ҳәа. Сара усҟан сахлафаауит "Аибашьреи аҭынчреи" "акомикс" ахь ииаганы ахәаԥшра. Сара асаит аҿы аматериал дуқәа ыҟазароуп ҳәа исԥхьаӡоит – иаҳҳәап, Апарламент, Аиҳабыра реилазаара реилатәарақәа уҳәа егьырҭгьы, избан акәзар, ари Аԥсны иахьатәи аҭоурых ауп, уи аофициалтә документқәа рҿы мацара акәымкәа иҟазароуп АИХ-қәа рҟынгьы", - ҳәа азгәалҭеит лара.Лана Ҵәыџьԥҳа "Аԥсныпресс" аҟны корреспондентс аус луеижьҭеи жәашықәса ҵуеит. Лара арахь дааит Аԥснытәи аҳәынҭқарратә университет ахԥатәи акурс аҟны дантәаз, лҵареи луси еилалыгӡон. Лана лзы зегь реиҳа игәырӷьахәны лгәалашәараҿы иаанхаз ахҭысқәа ируакуп, атәыла ахада ипресс-конференциа. Уахь лара дрышьҭит аредакциаҿы аусура даналага рацәак мҵыцкәан. Лара дҵас илыман аусмҩаԥгатә азааҭгылара анаҩсгьы, аҳәынҭқарра ахада азҵаара иҭара."Даара сгәы хыҭхыҭуан, избан акәзар ари раԥхьаӡатәи ԥышәан, уи инаҷыдангьы аҳәынҭқарра ахада азҵаара изысҭар акәын. Хәыҷы-хәыҷла ажурналисттә усура сашьцылеит, иахьа ари аредакциа анҭыҵ схы џьаргьы избаӡом. Ара ҳара зегьы ҭаацәакны ҳаҟоуп, зегь ҳааицхыраауеит", - ҳәа инаҵшьны иазгәалҭеит Ҵәыџьԥҳа.Аинформациатә маҵзура аԥҵоуижьҭеи ԥыҭҩык анапхгаҩцәа рҽырԥсаххьеит. 1995 шықәса инаркны 1998 шықәсанӡа еиҳабыс дыҟан Беслан Гәырџьуа, 1998-2003 шықәсқәа рзы – Руслан Ҳашыг, 2003 шықәса инаркны 2014 шықәсанӡа – Манана Гәыргәлиаԥҳа, 2014-2020 шықәсқәа рзы – Рената Чагәааԥҳа, 2020 шықәса инаркны иахьа уажәраанӡа "Аԥсныпресс" ҩаԥхьа напхгара азылуеит Манана Гәыргәлиаԥҳа.

https://sputnik-abkhazia.info/20250101/aak-du-zmou-arytskha-2025-shysazy-asny-iazgaakho-aiubileia-1053266397.html

2025

Ажәабжьқәа

ab_AB

ажәабжьқәа, аԥсны