Гәынба Делба анапынҵа ииҭеит амаҵзурақәа амшцәгьа ахҟьаԥҟьақәа раԥыхразы рус еиҿыркаарц
© Sputnik / Томас Тхайцук
Анапаҵаҩра
АҞӘА, лаҵара 11 - Sputnik. Аԥсны ахада Бадра Гәынба амшцәгьа ахҟьаԥҟьақәа раԥыхреи ауааԥсыра ацхыраара рыҭареи рзы иахәҭоу зегьы ҟарҵарц анапынҵа ииҭеит аԥыза-министр Владимир Делба.
Иаха Аԥсны амш цәгьахеит, аԥшацәгьа асуан, уи иахҟьаны аҵлақәа каҳаит, аҩнқәа рхыбқәа хнашәеит, Аԥсны араионқәа зегьы лашарада иҟан. АҶА аиқәырхаҩцәа аҵх иалагӡаны араионқәа зегьы рҟны амҩақәа ирықәҳаз аҵлақәа аныргеит, ареспубликатә мҩадуа аҿы атранспорт аныҟәара шьақәыргылоуп.
Амшцәгьа ахҟьаԥҟьақәа раԥыхреи иҟоу аԥхасҭа ахәшьара аҭареи рзы аоперативтә штаб аԥҵоуп Гәдоуҭа.
Афон ҿыц асасааирҭа ахыб хнахын аигәа игылаз аҩнқәа ирықәҳаит.
Аҩада Ешыра ахатәыҩнқәа ԥшьба рхыб рыхнахит, иара убас Ҷанба имҩан ауада рацәа змоу аҩны ааха аиуит. Аҟәа араион ахада Алхас ҷыҭанаа иажәақәа рыла, алашара ахьыҟам ыҟоуп. Иҟалаз аԥхасҭазы ашәҟәқәа еидкылахоит, уи ашьҭахь амшцәгьа ахҟьаԥҟьақәа раԥыхразы иаԥҵоу акомиссиахь иалаҵахоит.
Риҵа аҵакыраҿы ахаҳә леит, амҩақәа рыцқьоуп иҳәеит амилаҭтә парк аиҳабы Адамыр Багаҭелиа.
