https://sputnik-abkhazia.info/20250514/ryshyk-eibashuan-aishtsa-dbaraa-iryzkny-1054599122.html

"Рыԥшьҩык еибашьуан": аишьцәа Дбараа ирызкны

"Рыԥшьҩык еибашьуан": аишьцәа Дбараа ирызкны

Sputnik Аҧсны

Аџьынџьтәылатә еибашьра Ду аан, афронт ахь абџьар иаҵагылартә иҟаз зегь ршьҭуан. Аҭаацәарақәа рызаҵәқәа реиԥш, ҩыџьа-хҩы ахьыҟазгьы уаҩ дынрыжьуамызт. Иахьа... 14.05.2025, Sputnik Аҧсны

2025-05-14T17:50+0300

2025-05-14T17:50+0300

2025-05-14T19:36+0300

аиааира ду – 80

аналитикеи аиҿцәажәарақәеи

аԥсны

аиааира ду аҭоурыхқәа

аиааира ду ҳзаазгаз

https://cdnn1.img.sputnik-abkhazia.info/img/07e9/04/18/1054599374_0:157:546:464_1920x0_80_0_0_ed1baee3686b08ddb81cd78127b0e435.jpg

Аџьынџьтәылатә еибашьра Ду аан, афронт ахь абџьар иаҵагылартә иҟаз зегь ршьҭуан. Аҭаацәарақәа рызаҵәқәа реиԥш, ҩыџьа-хҩы ахьыҟазгьы уаҩ дынрыжьуамызт. Иахьа зыӡбахә сымоу аишьцәа Дбараа рыԥшьҩык, азеиԥш ԥсадгьыл ахьчара иазгылеит. Ажәабжь анҵоуп аишьцәа руаӡәк Дорофеи имаҭа Бадра Дбар иажәақәа рыла. Аишьцәа Дбараа аҭаацәара ду иалҵит. Раб Басиаҭи ран Шьааиза Жьиԥҳаи жәҩык ахшара рхылҵит. Дорофеи, Платони, Мақсуҭи, Кәынҵали Аџьынџьтәылатә еибашьра Ду ианалага, афронт ахь ицартә рықәра аҵанакуан аҟнытә, аӡәаӡәала аԥсадгьыл ахьчара иазгылеит. "Сабду Дорофеи Дбар, 1940 шықәсазы Мгәыӡырхәатәи ашкол ф-класск далгеит. Аус иуан аколнхара "Алашара" аҟны. Аибашьра ианалага 16 шықәса ракәын ихыҵуаз, 18 шықәса данырҭала 1943 шықәсазы Кавказ ашьхақәа рыхьчаразы дрышьҭуеит. Устәи, III Украинатәи афронт аҟны деибашьуан. Далахәын Болгариа, Венгриа, Иугославиа, Австриа атәылақәа рхақәиҭтәра. Вена аныргоз сабду ахәра иоуоит", - аҭоурых дазааҭгылоит амаҭа. Дорофеи Дбар иҩныҟа даныхынҳә аколнхараҿы аусура далагоит. Арахә ааӡара деиҳабын, анаҩс абнахылаԥшҩыс дыҟан. Дорофеи Басиаҭ-иԥа иеибашьратәи иџьатәи лшамҭақәа рзы ианашьоуп аҳәынҭқарратә ҳамҭақәа жәпакы: "Аџьынџьтәылатә еибашьра" аорден I аҩаӡара, "Кавказ ахьчаразы", "Белград ахақәиҭтәразы", "Германиа агаразы" амедалқәа, "Аџьаҿы аҽалкааразы" уҳәа. Дорофеи 1953 шықәса инаркны Асовет Еидгыла Акоммунисттә партиа далан. Идунеи иԥсахит 61 шықәса дшырҭагылаз. Аибашьра аветеран иҭынхоит ԥшьҩык ахшара. Платон Басиаҭ-иԥа Дбар иакәзар 1941 шықәса инаркны 1943 шықәсанӡа деибашьуан Ростов ахырхарҭаҟны, артиллеристс дыҟан. Ахәра аниоу аҩныҟа даарышьҭуеит. Ишьапы днанаго даналага, аколнхараҿы аусура дадгылоит. Мақсуҭ Басиаҭ-иԥа Дбар 1939-1940 шықәсқәа рзы финтәи аибашьра далахәын. Анемеццәа Асовет Еидгыла ианақәла, иара азеиԥш ԥсадгьыл ахьчара дазгылоит. Аҭынч ԥсҭазаара аныҟала, амилициа аҟәшаҿы акраамҭа аус иуан. Кәынҵал Басиаҭ-иԥа Дбар аибашьра Ду ианалага 18 шықәса ихыҵуан. Иара деибашьуан Украинатәи афронт аҟны. 1942 шықәазы Севостополь ахьчараан ӷәӷәала ахәра иоуоит. Иԥсы илшәшәаны дахьышьҭаз аӷацәа дыҭҟәаны дыргоит. Убасҟан, Молчанов зыжәлаз алеитенант еиҳабы, зҽызӡар зҭаху рзы агәыԥ еидикыло далагеит. Кәынҵал дыруаӡәкхеит аҭҟәара аҟнытә ибналаз. Анаҩс ари агәыԥ апартизантә отриад иахәҭакхеит. Аибашьра ашьҭахь, Кәынҵал аҭҟәара дақәшәеит ҳәа ахара идҵаны Уссурисҟа дахыргоит, уаҟа аторф ыҵихуан. Кәынҵал ихәреи аторф аҵхраҿы иибаз аџьабааи игәабзиара анырра арҭеит. Иаргьы иашьа Дорофеи еиԥш ақәра дук изнымҵеит, 52 шықәса дырҭан идунеи аниԥсахуаз. Аишьцәа Дбараа ргәалашәара, иахьа еиҵагылаз абиԥара ҿа еиҷаҳауа иааргоит. Реибашьратә мҩа инарҵауланы ирзымдыруазаргьы, иҟоуп имыӡуа афакт.

https://sputnik-abkhazia.info/20250422/dgymshan-antipa-khagysh-iourykh-1054375471.html

https://sputnik-abkhazia.info/20250429/ikhyshaarakhy-dkhynit-lad-ashba-izkny-1054376402.html

2025

Ажәабжьқәа

ab_AB

аналитикеи аиҿцәажәарақәеи, аԥсны, аиааира ду аҭоурыхқәа, аиааира ду ҳзаазгаз