Жапаров мраҭашәаратәи атәылақәеи Америка анапхгареи рахь ихы нарханы аҳәамҭа ҟаиҵеит
© Sputnik / Дмитрий Астахов
/ Анапаҵаҩра
АҞӘА, нанҳәа 21 - Sputnik. "Аекономика аполитикахь аиагара аҭахӡам", абас иҳәеит Кырӷызсҭан ахада Садыр Жапаров мраҭашәаратәи атәылақәеи Америка анапхгареи рахь ихы нарханы, Британиа ду "Капитал банк" асанкциақәа анақәнаҵа ашьҭахь.
Ажьырныҳәамза инаркны Америкатәи асанкциақәа "Керемет банк" аганахь алагьы иалагалоуп. Аҳәынҭқарратә маҵзура "Капар" иаиҭаз аинтервиу аҿы атәыла ахада иазгәеиҭеит, мраҭашәаратәи атәылақәа акыргыз банкқәа "Урыстәыла иаҿагыло асанкциақәа ишрывсуа" атәы зҳәо ршаҳаҭгак шырзаамгаз.
Жапаров иажәақәа рыла, Урыстәыла миллионҩык рҟынӡа Кырӷызсҭан аҟынтәи амигрантцәа ыҟоуп, урҭ есыҽны миллиардла аԥара аарышьҭуеит. Урҭ аԥарақәа ԥсахны ауаа рхы иадырхәартә алшара рыҭатәуп. Убри аан, атәылаҿы иҟоу 21 банк рҟынтәи аҳәынҭқарратә банк "Керемет банк" заҵәык ауп аурыс ԥарала аус зуа.
"Иарбанызаалак фактк ыҟам, агәызҩара мацара ауп. Убри азоуп саргьы агәызҩара зсымоу. Избан акәзар, урҭ ирбоит Кырӷызсҭан аекономика ӷәӷәала ишеизҳауа. Иаҳҳәап, ҳтәыла аҩнуҵҟатәи аалыҵ 11,7 процент рыла иазҳаит, ҳара егьырҭ ИАР атәылақәа рыбжьара аԥхьагылара ҳамоуп. Сгәанала, убри азоуп изҳақәыӷәӷәоугьы. Атәыла дуқәа егьырҭ атәылақәа ирласны рыҿиара рҭахӡам, еилаҳар рҭахуп. Ирҭахуп зегьы дара ирхьыԥшызарц, ирымҵахырхәаларц", — азгәеиҭеит Жапаров.
