АҞӘА, цәыббра 22 - Sputnik. Аԥснытәи аделегациа алахәуп Нхыҵ-Кавказтәи аҿар рфорум "Каспи".
Аԥсны ахьӡала иқәгылоит 15-ҩык – Аҳәынҭспорттә еилаки Аԥснытәи аҳәынҭқарратә университети рҟынтәи аспециалистцәеи астудентцәеи.
Апрограмма ихадоу хә-хырхарҭак рыла ишьақәгылоуп: аҿар рпатриоттә ааӡара, Аиааира 80 шықәса ахыҵра аҳәаақәа ирҭагӡаны жәларбжьаратәи аусеицура, ахатәгәаԥхаралатә усура, ацифратә компетенциақәа рыҿиара, асоциалтә ҵакы змоу аԥшьгамҭақәа рылахәхара. Аусмҩаԥгатә алахәылацәа, иара убас, аекспертцәеи дареи рырҵаратә сессиақәа, Каспиатәи амшын аԥшаҳәаҿы аспорттә усмҩаԥгатәқәа, аҟазаратә хәылԥазқәа рхы ыладырхәраны иҟоуп.
Зегь реиҳа активра аазырԥшуа аделегатцәа асоциалтә ҵакы змоу апроектқәа аус рыдырулар рылшоит, урҭ рынагӡаразы агранттә цхыраара аиуразы аицлабра иалахәхартә алшара роуеит.
Аусмҩаԥгатә мҩаԥысуеит цәыббрамза 22 инаркны 27 рҟынӡа, уи еиднакылоит 14-35 шықәса зхыҵуа 500-ҩык инареиҳаны ауаа.
