https://sputnik-abkhazia.info/20260601/alashara-zkhyluaz-auay-anatoli-laglaa-65-shysa-ikhyra-iazkny-1063372225.html

Алашара зхылҵуаз ауаҩы: Анатоли Лагәлаа 65 шықәса ихыҵра иазкны

Алашара зхылҵуаз ауаҩы: Анатоли Лагәлаа 65 шықәса ихыҵра иазкны

Sputnik Аҧсны

Аԥсуа поет, апрозаик, апублицист, "Ахьӡ-Аԥша" III аҩаӡара занашьаз Анатоли Лагәлаа диижьҭеи 65 шықәса ҵит. Изаамҭанымкәа зҭаацәеи зыжәлари нзыжьыз арҿиаҩы... 01.06.2026, Sputnik Аҧсны

2026-06-01T09:00+0300

2026-06-01T09:00+0300

2026-06-01T12:47+0300

аԥсны

аналитикеи аиҿцәажәарақәеи

https://cdnn1.img.sputnik-abkhazia.info/img/07e4/07/11/1030552910_0:160:3073:1888_1920x0_80_0_0_812821c1bf2fdcda6ea3f4d3edf84c54.jpg

Бадраҟ Аҩӡба, SputnikХарҭәаашьа змам ацәыӡРашәара аказы ажурнал "Алашара" аредакциаҟны Анатоли Лагәлаа ииубилеи азгәаҭара ргәы иҭан, аха аредактор хада 65 шықәса ихыҵра идырныҳәалартә изыҟамлеит – апоет иаалырҟьаны идунеи иԥсахит жәабран 15 рзы.Шықәсы рацәала ажурнал зџьабаа адызҵахьаз Анатоли Лагәлаа иҟамзаара аколлектив акыр ирныԥшуеит, уи ихатәраз иуаҩреи, аусураҟны имаз аԥышәеи даара зегьы ирыгуп – иҳәоит ажурнал аредактор хада инапынҵақәа назыгӡо Аинар Ҷыҭанаа."Ажурнал "Алашара" аҟны 2004 шықәса раахыс редактор хадас аус иуан, иара убриаҟара аус иухьан апоезиа аҟәша аиҳабыс, нас аҭакзыԥхықәу маӡаныҟәгаҩс. 40 шықәса инацны абри ахәшҭаара дазааԥсахьан, ажурнал агәеисра агәҭаҵәҟьа далагылан, илшарақәа рыхә ашьара сара сзы иуадаҩуп", - иҳәоит иара.Апериодикатә ҭыжьымҭа Аинар Ҷыҭанаа дадҳәалоуижьҭеи ԥыҭраамҭак ҵуеит. Уи иазӷәеиҭоит Анатоли Лагәлаа арҿиара знапы алаку аҿар рахь агәбылра шимаз, урҭ рҩымҭақәа "Алашара" адаҟьақәа рҿы лассы-лассы ишикьыԥхьуаз.Иара иазгәеиҭеит ажурнал "Алашара" ахԥатәи аномер ишаныло Анатоли Лагәлаа игәалашәара иазку аматериалқәа – апоет иҩызцәеи иколлегацәеи изкны ирҳәаз ажәа, ихьӡынҩыланы иаԥырҵаз ажәеинраалақәа, иара убас автор аҵыхәтәантәи аамҭазы иҩыз арҿиамҭакәа."70 шықәса инареиҳаны ԥсышәала мацара иҭыҵуа журнал заҵәык ауп иҳамоу. Убри аҟнытә ари ахәшҭаара иахьынӡаҳалшо ԥхьаҟа инаҳгалар ауп, уи азы иҳалшо зегь ҟаҳҵалар ауп", - иҳәеит ажурнал аредактор хада инапынҵақәа назыгӡо.Апоет игәалашәараАжурнал "Алашара" адаҟьақәа рҟны хыԥхьаӡара рацәала ианылоит еиуеиԥшым арҿиамҭақәа. Аӡәырҩы апериодикатә ҭыжьымҭа иадҳәалоуижьҭеи акыр ҵуеит. Урҭ дыруаӡәкуп Гәында Аӡынԥҳа. Лара 27 шықәса аус луеит Аԥсны аҵара аминистрраҟны."Жәаҳәарада ара ажурналқәа "Алашара", "Амцабз" аредакциақәа ҳарзааигәоуп, убри азы аҭыжьымҭақәа русзуҩцәеи ҳареи ҭаацәарак ҳакәушәа ауп ҳаибабара шыҟоу. Ажурналқәа ирныло аҩымҭақәа зегьы ҳрызҿлымҳан, ҳрыԥхьон", - азгәалҭеит лара.Анатоли Лагәлаа азнеишьа бзиа иман арҿиара знапы алаку рганахь ала, ааигәа аҩра иалагаз ргәы ахымшәартә ажәа реиҳәон, раԥҵамҭақәа ак рыгзаргьы, иаахжәаны ирыдибалаз атәы иҳәаӡомызт, лҳәоит Аӡынԥҳа."Иҟоуп иагьа роуҳәаргьы згәы казмыжьуа, иҟоуп раԥхьа ираҳаз ажәа арҿиара ргәы анахнаршәо, иҟоуп иара убас зынӡа зхы иақәымгәыӷӡо, аха ажәа ҟәанда анраҳалак иҵегь ҟасҵандаз ҳәа зымҵәыжәҩақәа шьҭызхуа ауаа. Убас угәы шьҭызхуаз дыруаӡәкын Анатоли Лагәлаа, аҩымҭа иаԥсамзаргьы, акыр агзаргьы, угәы ҟаиҵон", - лҳәеит лара.Лажәа иацҵо Аӡынԥҳа дазааҭгылт ауаҩы изы зегь раԥхьа игылазар шакәу иуаҩра – инапы злаку аус аҿы иагьа еихьӡара имазаргьы, уи дызларгәалашәо ихатәы ҟазшьақәа рыла шаку.Ажурнал "Алашара" аредактор ихаҭыԥуаҩ инапынҵақәа назыгӡо Заира Ҭҳаиҵыкәԥҳа Анатоли Лагәлаа дылдыруеижьҭеи такә аамҭа ҵуеит, лыстудент шықәсқәа раахыс."Аха иаҳа иааигәыны даныздыр аибашьра ашьҭахь ауп, Ашәҟәыҩҩцәа реидгыла саналала ашьҭахь. Анатоли Лагәлаа еснагь аччаԥшь иҿықәын, длаша-лашо даауԥылон. Ииашаҵәҟьаны иқәгыларақәа, еиуеиԥшым аиԥыларақәа раан, ҳахьаацәырҵуаз ҳирԥшӡон, ҳахьивагылаз ҳгәы иладуун", - лҳеит лара.Лара иазгәалҭеит Анатоли Лагәлаа иҟазшьа ҷыдақәа ишыруакыз дызҿызаалак аус аҟны имаз аҭакԥхықәра ду. Апоет идунеи аԥсахра рацәак шагмыз ахәыҷтәы жәеинраалақәа зыҩуа Заира Ҭҳаиҵыкәԥҳа илабжьеигеит аԥҵамҭақәа еидкыланы хаз-шәҟәны аҭыжьра."Абри сгәы аазҭеиҵан, сажәеинраала хәыҷқәа исымаз ааидкыланы иҭсыжьит, иара ишиҳәаз еиԥш, иажәа дамеижьеит – абра аредакциаҿы иқәиргылеит".Кристина Қәҭелиаԥҳа ажурнал "Алашара" аредакциаҿы корректорс аус луеижьҭеи жәашықәса иреиҳауп. Лара лажәақәа рыла, Анатоли Лагәлаа аус ицура даара иманшәалан."Иара иусура даара еиҿкаан, ииҳәазгьы ҳәан, иажәақәа рышьақәырӷәӷәашьагьы дақәшәон. Шықәсык ахь ф-номерк иҭҳажьуаз ажурнал ԥымкрада еиқәиршәон, аматериалқәа реизгарагьы инапы алакын, авторцәа рызнеишьа идыруан. Анатоли Ианкәа-иԥа редакторк иаҳасабала иҩаӡара даараӡа иҳаракын, иара зҭак ҟаимҵоз зҵаарак ҟалаӡомызт, аредакциаҿы мамзаргьы уи анҭыҵ", - лҳәеит Қәҭелиаԥҳа.Ирма Џьниаԥҳа аредакциаҿы дкорректоруп. Анатоли Лагәлаа лара лгәалашәараҿы даанхоит илаҿыхыз, иразыз уаҩны.Лажәа иацҵо Џьниаԥҳа илҳәеит, Анатоли Лагәлаа аусура анаҩсангьы аус зциуаз аколлектив рыцәгьеи рыбзиеи шрыцеиҩишоз, еснагь рааигәа дшыҟаз.Ажурнал "Алашара" аредактор хада Анатоли Лагәлаа иԥсҭазаара далҵит жәабран 15 рзы.Анатоли Лагәлаа диит рашәара 1 1961 шықәсазы Ҷлоу ақыҭан. Асовет Еидгылеи, Аԥсни Урыстәылеи Ашәҟәыҩҩцәа реидгылақәа далахәылан. 2004 шықәса раахыс алитературатә-сахьаркыратә журнал "Алашара" аредактор хадас дыҟан. Алитературазы Д. Гәлиа ихьӡ зху аҳәынҭқарратә премиа далауреатуп, иара убас Т. Аџьба ихьӡ зху ахәыҷтәы литературазы аҳәынҭқарратә премиа далауреатуп.Иҭижьит 15 инарзынаԥшуа иажәеинраалақәеи, иажәабжьқәеи, иповестқәеи еидызкыло ашәҟәқәа. Иҩымҭақәа еиҭагоуп аурыс, англыз, асерб, аерман, ауаԥс бызшәақәа рахь. Еиуеиԥшым ашықәсқәа рзы имҩаԥигон авторс дызмаз алитературатә дырраҭарақәа Аԥсуа телехәаԥшреи Аԥсуа радиои рҿы.Анатоли Лагәлаа иааиԥмырҟьаӡакәа аматериалқәа икьыԥхьуан Sputnik Аԥсны аҟны. Амилаҭтә литература аҿиараҿы злагала дуу ашәҟәыҩҩцәеи, апоетцәеи, алитературатә критикцәеи, авторцәа ҿарацәеи дрыҿцәажәон.

https://sputnik-abkhazia.info/20260326/araaseit-araaseit-akarra---ara-zyznamgaz-apoet-anatoli-laglaa-igalasharazy-1061798954.html

https://sputnik-abkhazia.info/20240601/aliteraturat-eshara-szyzuz-anatoli-laglaa-iriara-ma-akhykhyra-iazkny-1049990752.html

https://sputnik-abkhazia.info/20210601/Abziabarat-lirika-ayzhara-azo-apoet-Anatoli-Laglaa-60-shysa-ikhyit-1032491270.html

2026

Ажәабжьқәа

ab_AB

аналитикеи аиҿцәажәарақәеи