"Бзиала ҳаибабап!": Сусанна Ҭаниаԥҳа имҩасыз ашықәс азтәи алкаақәа ҟалҵеит

Аамҭа аҽыҩ ццышә – иццакуеит, иԥыруеит. Иузгәамҭакәа иумпыҵхәраауеит, ԥхьаҟа ус шәкы узышьҭазаргь. Уи зҽызымԥсахуа аԥсҭазаара азакәанқәа иреиуоуп.

Наунагӡа ҳәа адунеи аӡәгьы дықәӡам, досу иара иаамҭа изыԥҵәоуп.

Абас маҷ-маҷ угәы еилазырԥшыша ацәаныррақәа сызныжьны, жәаҩа шықәса рнаҩс "Бзиала, ҳаибабап!" ҳәа иниасит ацә ашықәс.

Сызгәылархалаз философиатә хәыцрақәа срыцәхьаҵны, шьҭа салацәажәар цәгьа избом иаҳхысыз ашықәсазтәи сусура, уимоу, аханатә аиҭаҳәара салагар еиӷьуп.

Зегь раԥхьа инаргылан исҳәарц сҭахуп, сара "Аԥсуа бызшәеи алитературеи" рзанааҭ ала Аԥснытәи аҳәынҭқарратә университет афилологиатә факультет сшаушьҭымҭоу. Уи сагьазгәдууп. Сҵара анхсыркәша ашьҭахь сзанааҭ хадала аусура сгәы азыҳәон.

Арҵаҩы изанааҭ снапахьы иаазгаратәы аҭагылазаашьа снаҭеит Кьыршьал Шамил-иԥа Чачхалиа ихьӡ зху Ԥақәашьтәи абжьаратә школ №2. Исызгәакьаз, схаҭа сзылгахьаз ашкол ашәқәа сзаатит шьҭа "Аԥсуа бызшәеи алитературеи" рырҵаҩык лаҳасабала. Шәымҭак ааҵуаны сзанааҭ иадҳәалоу егьырҭ ахырхарҭақәа рҿы аусура сыдыргало иалагеит.

Анаҩс, аҟәышреи адырреи иргәеисырҭоу Д. И. Гәлиа ихьӡ зху Аԥсуаҭҵааратә институт аҟны сусура хацсыркит афольклортә лабораториа аусзуҩ лаҳасабала. Дук хара имгакәа сыԥсҭазаараҿы ицәырҵит Жәларбжьаратәи аинформациатә маҵзура Sputnik Аԥсны.

Иахьеиԥш исгәалашәоит Sputnik Аԥсны аԥсуа аҟәша аредактор Рада Жьиԥҳа аҭел данысзасыз. Лгәыразреи лыхаареи зныԥшуа лыбжьала ԥхьаҟатәи ҳусеицура акәамаҵамақәа ансеиллыркааз.

Абҵарамза 13, 2017 шықәсазы "Ахкаршәра, агараҿаҟәара – аԥсуаа ржәытә ҭаацәараԥҵара иазку згәаҭарақәак" захьӡыз сыстатиа маҷ акьыԥхь абеит Sputnik Аԥсны асаит аԥсуа ҟәшаҿы.

2018 шықәсазы сшьақәырӷәӷәан арубрика "Жәлар рдоуҳа" иаҵанакуа анҭыҵтәи усзуҩк лаҳасабала, уи арубрика гәыблыла сазааԥсоит иахьа уажәраанӡагьы.

"Жәлар рдоуҳа" еиднакылоит ҳмилаҭ рҵас, ретнологиа, рфольклор, ркультура уҳәа еиуеиԥшым ахырхарҭала адыррақәа узҭо, иҷыдоу астатиақәа. Иаҳхысыз ашықәс иҭагӡаны Sputnik Аԥсны аԥсуа версиаҿы иҭагалоуп еиуеиԥшым атемақәа ирызку сыстатиақәа ҩажәи жәаха инарзынаԥшуа. Аиашазы, сеихьӡарақәа дуӡам, аха зынӡагьы гәырԥынҵак иаҟароуп ҳәагьы узҳәом. Ааигәа аус здызулаз астатиақәа иреиуоуп: "Агәыла агәы даҩызоуп", "Игәырҩахҽыгахаз, ихәрарӷьагахаз: амузыкатә рҳәага ахымаа иазкны", "Ауаа реиныршәараҿы ицхыраагӡаз амахазы дыррақәак", "Хцәы бырфын": ԥсыуаҵас аԥҳәызба лыхцәныҟәгашьа" уҳәа.

Шьҭа ҩбаҟа шықәса инархыҳәҳәоит арубрика "Жәлар рдоуҳа" аусзуҩцәа еиқәдыршәо рыстатиақәа арадио Sputnik Аԥсны астудиаҿы иаԥхьартә, азыӡырҩцәа рзы рыбжьы ҭарҩыртә аҭагылазаашьа рымоуижьҭеи. Астатиа аиқәыршәара аамышьҭахь, автор имоуп аҭагылазаашьа, ицәыргоу атема ибжьала арадио азыӡырыҩцәа рызнагара. Асаит аҿы ауаа аԥхьаратәы, арадио аҿы иазыӡырыҩратәы аҭагылазаашьа рзаԥҵоуп.

Жәларбжьаратәи аинформациатә маҵзуреи арадиои Sputnik Аԥсны цәырҵижьҭеи, жәаҳәарада, иаиухьеит ахатәы аудиториа. Аусзуҩцәа (хаҭала саргьы уахь сналаҵаны) дара ргәаанагара, рыгәҭахәыцрақәа зныԥшуа статиак аредакторцәа ианрыдыргалалак, иргәаԥханы асаит иҭарҵозар, изҩыз ихьӡ-ижәла анаҩс азанааҭтә терминологиа инақәыршәаны "аколумнист" ҳәа дадырбоит.

Ажәа "аколумнист" лаф хҭыск сақәнаршәахьеит.

Арадио Sputnik Аԥсны аефираҿы аколумнист лаҳасабала зны сыхьӡ-сыжәла рҳәазаарын, сыздыруаз, аиҳабыратә абиԥарахь иаҵанакуаз ауаа ари атермин аефираҿы ианраҳа, ишыгәныркылаз дара зышьцылахьаз "акоммунизм" ҳәа акәзаап.

Ҽнак урҭи сареи ҳаиқәшәеит.

"Сусанна, Асовет мчра хыбгалеижьҭеи ианбатәиу, арахь бара коммунистс аусура балагеит ҳәа ҳаҳаит! Ҳаамҭазы акоммунизм абаабгеи?" - ҿааиҭит руаӡәк.

Саргьы сыччаԥшь аасызнымкылеит. "Акоммунизм акәым, аколумнистроуп", - сҳәеит.

Абас лахҿыхрыла ихсыркәшарц сҭаххеит имҩасыз ашықәсазтәи алкаақәа.

Астатиа иаԥхьаз зегьы гәык-ԥсыкала ишәыдысныҳәалоит ҳазҭалаз 2022-тәи Ашықәс ҿыц!