АҞӘА, нанҳәа 2 – Sputnik, Бадраҟ Аҩӡба. Фазиль Искандер Москва анышә дамардоит иԥсы анҭаз иҟаиҵаз аҳәахьа инақәыршәаны, ҳәа иҳәоит Аԥсны Аԥыза-министр инапынҵақәа назыгӡо Шамил Аӡынба.
"Ирацәаҩуп иҵаауа абри аганахьала. Аха ҳара ашәҟәыҩҩы иҭаацәа рыгәрамгара азин ҳамам. Иԥҳәыси ихшареи ирҳәеит иара уаанӡа аҳәахьа шыҟаиҵахьаз Москва ақалақь аҟны анышә дамадазарц. Иара гәыла-ԥсыла даԥсыуан, аха иԥсҭазаара абжеиҳара Москва ихигеит", — иҳәеит Аӡынба.
Фазиль Искандер аԥсуаа мацара дыртәымызт, иара адунеи уаажәларра, аиҳаракгьы аурыс дунеи дахәҭакын, ҳәа азгәеиҭоит Аӡынба.
"Ҳара иара игәалашәара анаӡаӡатәразы иахәҭаны иҟоу аусмҩаԥгатәқәа зегьы азгәаҳҭоит", — иҳәеит иара.
Иахьа Аԥснынтәи Москваҟа ицеит аделегациа, алахьеиқәҵаратә усмҩаԥгатәқәа ирылахәхарц.
Фазиль Абдул-иԥа Искандер диит хәажәкыра 6 1929 шықәса рзы, Аҟәа. 1954 шықәса рзы далгеит А.М. Горки ихьӡ зху Алитературатә институт.
Ҩышықәса рышьҭахь дхынҳәуеит Аԥсныҟа, Аҳәынҭшәҟәҭыжьырҭа аԥсуа ҟәша аредакторс.
1956 инаркны иҩымҭақәа ркьыԥхьуан ажурналқәа: "Смена", "Неделя", "Костер", "Сельская молодежь" уҳәа рыҟны. Раԥхьатәи иажәеинраалақәа реизга "Горные тропы" ҭыҵит 1957 шықәса рзы Аҟәа. 1966 шықәса рзы ажурнал "Новый мир" аҟны икьыԥхьын аповест — "Созвездие Козлотура".
Искандер ирҿиамҭақәа ирылукаартә иҟоуп "Сандро из Чегема" (1973-1988, автобиографиатә ҩымҭа).
Искандер иажәабжьқәеи иповестқәеи еиҭагоуп шамахамзар европатәи абызшәақәа зегьы рахь.
Искандер иҩымҭақәа ирылхны иҭыхын абарҭ афильмқәа: "Воры в законе", "Пиры Валтасара, или Ночь со Сталиным", "Маленький гигант большого секса".
Фазиль Искандер ианашьан аорденқәа "За заслуги перед Отечеством" III (1999), II (2004), IV (2009) аҩаӡарақәа, "Ахьӡ-аԥша" аорден I аҩаӡара, Аԥсны (2002).
Ашәҟәыҩҩы анышә дамадахоит акомпозитор Андреи Ешпаии уаанӡатәи аминистр, асенатор Александр Починоки рывара.
