03:57 15 Нанҳәа 2018
Ишиашоу ицо аефир
  • USD66.75
  • EUR76.23
Пресс-конференция в министерстве культуры

Хынҭәба: XIV жәларбжьаратәи атеатртә фестиваль аҟны ақәҿиара ду ҳаман

© Sputnik Бадрак Авидзба
Аԥсны
Икьаҿу ахьарԥш аиура
20 0 0

Адраматург Александр Володин игәалашәара иазкыз, XIV жәларбжьаратәи атеатртә фестиваль "Хә-хәылԥазык" иалахәын Фазиль Искандер ихьӡ зху Аҳәынҭқарратә аурыс драматә театр. Афестиваль мҩаԥысуан Санкт-Петербург, жәабран 6-10 рзы.

АҞӘА, жәабран 15 – Sputnik, Бадраҟ Аҩӡба. Аспектакль "Хә-хәылԥазык", адраматург Александр Володин игәалашәара иазкыз, XIV жәларбжьаратәи атеатртә фестиваль аҟны қәҿиарала имҩаԥысит иҳәеит Фазиль Искандер ихьӡ зху Аҳәынҭқарратә аурыс драматә театр адиректор хада Иракли Хынҭәба.

Иара иҿы иқәшаҳаҭхеит РУСДРАМ аҟны аспектакль анықәдыргылоз акыр ашәара шимаз.

"Аспектакль анықәҳаргылоз акыр сшәон. Ҳахәаԥшыҩцәа асеиԥш иҟоу аспектакльқәа ирышьцылам. Ҳара аемоциақәа ҳҽырцәаҳахьчоит, иаҳӡар бзиа иаабоит. Аспектакль аҟны ҳцәаныррақәа зегьы аарԥшуп. Абасеиԥш ашәара шсымазгьы аспектакль ақәҿиаарду аиоуит. Санкт-Петербург ҳақәгылараангьы ақәҿиара ду аманы ирыдыркылеит", — ҳәа еиҭеиҳәоит Хынҭәба.

РУСДРАМ адиректор хада иазгәеиҭеит Володинтәи афестиваль есышықәса имҩаԥырго ныҳәаны ишыҟоу, аҽакы иаламҩашьо хҭысны ишырыԥхьаӡо.

"Афестиваль атмосфера ҷыда амоуп. Иара алахәра акраҵанакуаны иршьоит, ахьӡ ду амоуп", — иҳәоит адиректор хада.

РУСДРАМ аспектакль Володинтәи афестиваль аԥхьахә анашьахеит.

"Асеиԥш аԥхьахә аиура "Ахьтәы сабарда" аиура еиԥшнысшьалоит. Сынтәа афестиваль иалахәын Вахтангов ихьӡ зху атеатр, Таганка иҟоу атеатр, Москватәи ахәаԥшҩы қәыԥш итеатр, Санкт-Петербургтәи атеатр, Китаитәи атеатри ҳара ҳтеатри", — ҳәа еиҭеиҳәоит Хынҭәба.

Иракли Хынҭәба еиҭеиҳәеит ҳартистцәа ршьапы иқәгыланы напеинҟьарыла ишымҩаԥыргоз. РУСДРАМ артистцәа еиҭарҳәон аспектакль ашьҭахь петербургтәи атеатртә журнал аредакциаҟны уи алацәажәара шымҩаԥгаз. 

"Ҳара ҳзы уи акраҵанакуеит, ихәарҭоуп", — иҳәеит иара.

Аԥсны Акультура аминистр Ельвира Арсалиаԥҳа РУСДРАМ артистцәа ирыдылныҳәалеит реихьӡарақәа.

"Сгәы иаанагоит шәара шәзы иааироуп ҳәа абасеиԥш ахьӡ-аԥша змоу афестиваль аҟны шәахьалкаахаз. Шәара шәзы уи иагьԥышәа дууп", — лҳәеит аминистр.

Аминистр иазгәалҭеит Аԥсны иқәдыргыло аспектакльқәа атәыла анҭыҵгьы ахьӡ ҳарак иаԥсаны иахьырыԥхьаӡо аҵакы дуны ишылыԥхьаӡо. 2016 шықәса лаҵарамза 24 раахыс РУСДРАМ напхгара аиҭоит адиректор хада Иракли Хынҭәба.

Пресс-конференция в министерстве культуры
© Sputnik Бадрак Авидзба
Пресс-конференция в министерстве культуры

Ихадоу атемақәа