Арра-спорттә хәмарра "Аиааира" мҩаԥысит Гагра араион

© Foto / Саида ЖибаА-14-тәи арра-спорттә хәмарра «Аиааира» мҩаԥысит Гагра араион
А-14-тәи арра-спорттә хәмарра «Аиааира» мҩаԥысит Гагра араион - Sputnik Аҧсны
Анапаҵаҩра
Аиааира Ду иахьӡынҩылаз, итрадициатәу арра-спорттә хәмарра "Аиааира" мҩаԥысит Гагра араион.

Sputnik, Саида Жьиԥҳа

Есышықәса, Аџьынџьтәылатә Еибашьра Дуӡӡаҿы Асовет жәлар иргаз Аиааира иахьӡынҩыланы, Гагра араион аҵара аҟәша аԥшьагарала, Алаҳаӡыхьтәи астадион аҟны имҩаԥысуеит ашколхәыҷқәа ркомандақәа злахәу, арра-спорттә хәмарра "Аиааира".

Сынтәа, а-14-тәи аицлабра иалахәын араион 13 школ рҟнытә 130-ҩык ахәыҷқәа. Дара еиндаҭлон ар рашәа нагӡауа ацәаҳәа ақәсраҿы, автомат аимыхреи, аибыҭареи рҿы, арҭҟәацга аршәраҿы, аҽышьҭхраҿы, шәки, аашәи, зқьи хәышә метри аҩреи рыла.

12-тәи арра-спорттә хәмарра Аиааира мҩаԥысит Гагра - Sputnik Аҧсны
Арра-спорттә хәмарра "Аиааира" Аԥсны имҩаԥысит

Арра-спорттә хәмарраҿы аҿар рылҵшәақәа ахәшьара арҭон аҵара аҟәша аспециалистцәеи, арра-патриоттә ааӡара амаҭәар амҩаԥгаҩцәеи рыла ишьақәгылаз аӡбаратә гәыԥ.

Ианакузаалак, Гагратәи ашколхәыҷқәа араиони, ареспубликатә тури рҟны, арра-спорттә хәмарраҿы рхы бзианы иаадырԥшуеит. Ашколхәыҷқәа маха-шьахала иазыҟаҵоуп, насгьы, иџьоушьаша абџьар ахархәашьа цәгьамкәа ирдыруеит, уимоу арҭҟәацга азныҟәашьагьы.

"Изныкымкәа ҳхәыҷкәа ареспубликатә тур аҟны аԥхьахәтә ҭыԥқәа ааныркылахьеит. Ҳамеигәырӷьар залшом ҳаҷкәынцәеи, ҳаӡӷабцәеи аиааирахь ирымоу агәазыҳәара. Арҭ алҵшәақәа хымԥада абҩарҵәыра амаҭәаргьы иабзоуроуп, уантәи ауп рымаха-рышьаха аӷәӷәара ашьаҭа ахьынтәаауо", - ҳәа азгәеиҭеит арра-патриоттә ҽазыҟаҵареи, абҩарҵәыреи рзы Гагра араион аҵара аҟәша аспециалист хада Гамлет Елбакиан.

Ашьыжь инаркны хәылбыҽханӡа, 130-ҩык ахәыҷқәа, ашоура шыҟазгьы ҭакԥхықәрала рҿаԥхьа иқәгылаз адҵақәа нарыгӡеит. Аха аицлабраҿы ишаԥу еиԥш аӡәы даиааиуеит, ҽаӡәы даҵахуеит.

Арра-спорттә хәмарра араионтә тур иалахәыз акомандақәа рахьтә, аԥхьахәтә ҭыԥқәа ааныркылеит: актәи аҭыԥ Цандрыԥшьтәи абжьаратә школ №1, азыҟаҵаҩ Ншан Каленџьиан, аҩбатәи аҭыԥ Гагратәи абжьаратә школ №1, азыҟаҵаҩ Едгар Кьетиа, ахԥатәи аҭыԥ Бзыԥҭатәи абжьаратә школ №1, азыҟаҵаҩцәа Романи, Едгари Кьетиаа.

Арра-спорттә хәмарра "Аиааира" ареспубликатә тур мҩаԥысуеит ҭагалан.

Ажәабжьқәа зегьы
0