АҞӘА, цәыббра 13 - Sputnik. Шәачатәи аҳазалхыҩцәеи аҳәаахьчаҩцәеи 2019 шықәса цәыббра 10 рзы иааныркылеит контрабандала аҭаҭын аалыҵ аҳәаа иахызгоз автомашьына. Абри атәы аанацҳауеит аусбарҭа апресс-маҵзура.
Аԥснынтәи аҳәаахь инеиз автомашьына "Cherya15" аԥсҟы зкыз аҳәаа иахысраан иҳәеит аҳазалхратә шәҟәҭагалара зыхәҭоу атауар сымам ҳәа. Аха иара иԥсахеибакшьа, иццакышьа агәыҩбара рызцәырнагеит аҳәаахьчаҩцәа. Амобилтә инспекциа-гәаҭаратә комплекс ахархәарала амашьынаҿ амаӡаҭыԥ рбеит. Уа иҵәахын 87 ҭоԥ асигарет.
Џьаргьы аус зымуа, 24 шықәса зхыҵуа Аԥсны атәылауаҩ иҳәеит асигареҭ ҭоԥқәа изымдыруа џьоукы рыҳәарала аҳәаа иахызгон ҳәа. Урҭ иҳәазгьы роуп амашьынаҟны амаӡаҭыԥгьы ҟазҵазгьы, иҳәеит иара. Ари аус азы аԥара изыршәараны иҟан.
Изакәаным атауари амашьынеи аанкылоуп. Атауар аекспертизахь инашьҭуп. Ихацыркуп административтә зинеилагара иаҵанакуа аусҭҵаара.
