13:11 14 Жьҭаара 2019
Ишиашоу ицо аефир
  • USD64.22
  • EUR70.73

Аҽыбӷаҟазара аныҳәа: Мықәашҭа аицлабрақәа мҩаԥысит

© Sputnik / Томас Тхайцук
Аԥсны
Икьаҿу ахьарԥш аиура
16 0 0

Жьҭаара 6 рзы Мықәашҭа аныҳәа шымҩаԥысыз, аиҿкааҩцәа иаздырхиаз амилаҭтә хәмаррақәа ртәы шәаԥхьар шәылшоит Sputnik аматериал аҿы.

Сариа Кәарцхьиаԥҳа, Sputnik

Аҽырыҩра, аҵәеигәыдҵа, аҽылампыл – абарҭ зегьы Аԥсны имҩаԥырго аҽыбӷаҟазаратә еиндаҭларақәа рҿы иаарԥшуп.

Абжьыуаа рҿы еицырдыруа аҭыԥ Мықәашҭа Аԥсныаҽыбӷаҟазаратә мзар аҟны есышықәса иарбоуп.

© Sputnik / Томас Тхайцук
Мықәашҭа аныҳәаан еизоит аҽыбӷаҟазара абзиабаҩцәа аӡәырҩы

"Сара саныхәыҷыз инаркны ареспубликаҿы имҩаԥысуаз аҽырхәмаррақәа зегь рахь сыргон. Саби сабдуи ари аҟазара абзиабара сыларааӡон. Сара уажәы уи смоҭа Нарҭ имаздоит. Хәышықәса шракәугьы ихыҵуа, аҽқәа дрышьцылоуп, дрыцәшәом", - ҳәа ҳзеиҭеиҳәоит Владимир Гогәуа.

Владимир Гогәуа аџьар ахьеизо аҭыԥқәа рахь шамахамзар аԥсуамаҭәа ишәҵаноуп дышнеиуа.

Сынтәатәи аспорттә ныҳәа азкын Аԥсны Аиааиреи Ахақәиҭреи 26 шықәса рхыҵра аныҳәа.

© Sputnik / Томас Тхайцук
Аҽылампыл

Уажәы атәыла ахадацәа хҩык - Владислав Арӡынба, Сергеи Багаԥшь, Рауль Ҳаџьымба Рыхраҿақәа ргаразы Мықәашҭа еиндаҭлон. Иара убасгьы еиндаҭлон Мықә ақыҭа ахадареи Очамчыра араион ахадареи раԥхьахәқәа ргаразы.

© Sputnik / Томас Тхайцук
Ахраҿақәа

1200 метра иҟаз аԥхьатәи аҽқәа реиԥхныҩлараҿы аиааира игеит Ҟәланырхәа ақыҭа аҽыҩҷкәын Оскар Ҭраԥшь.

Аџьынџьтәылатә еибашьраан иҭахаз ргәалашәаразы аԥхьахә игеит Пицундатәи аҽыҩҷкәын Инал Гамгьиа.

Аԥсны раԥхьатәи ахада Владислав Арӡынба ихраҿа иаҭәашьахеит Дмитри Қардиа (Ҷлоу). Рауль Ҳаџьымба Ихраҿа ианашьахеит Амиран Багаҭелиа (Гәдоуҭа).

Аҽыбӷаҟазаратә хкқәа рыдагьы, еизаз идырбан аимҵакьачеи ахыци ахәымпали рыла ахысреи.

© Sputnik / Томас Тхайцук
Ахыци ахәымпали рыла ахысразы аиндаҭлара

Аҵыхәтәантәи аамҭазы ари аспортхкы акыр ирылаҵәаны иҟалеит. Ахыцуаҩ Асҭамыр Матуа иажәақәа рыла, аклуб "Афырхы" шықәсык аҩнуҵҟала хәба-фба турнир мҩаԥнагоит.

"Ари аспорт хкы жәытәнатә аахыс ахархәара шамазгьы, аиндаҭларақәа мҩаԥаагоижьҭеи шықәсқәак роуп иҵуа. Сгәыӷуеит Мықәи Лыхни аныҳәақәа раан ахыци ахәымпали рыла аиндаҭлара хымԥадатәихап ҳәа", - иҳәоит Матуа.

Абри аспортхкаҿы аиааира игеит ахыцуаҩ Баҭал Џьапуа.

Ихадоу атемақәа