АҞӘА, рашәара 4 – Sputnik. Аԥснытәи абоксиор Харитон Агрба рашәара 15 рзы жәа-раундк иҟоу ақәгылара мҩаԥигоит урыстәылатәи аспортсмен Александр Подольски диндаҭло, абокс азы арегионалтә титул WBA аиуразы.
"Апандемиа инадҳәаланы ари ашоу иарку акы акәхоит. Иацы ақәгылара хада мҩаԥызгеит. Сара сзы жәа-раундк – иҿыцу дистанциоуп. Акомандеи сареи ақәгылара стратегиала ҳазнеиит, иаркыз алагер аҿы аҽазыҟаҵарақәа мҩаԥаагон. Уажәы инханы иҟоу сыкапан иахәҭаны ақәыршәароуп", - иҳәеит иара.
Харитон Агрба дызлахәу абокс азы ахәылԥаз днарбоит ателеканал "Матч ТВ".
"Ахәылԥаз, асааҭ жәба шыҟоу акәхар ҟалоит сықәгылара анымҩаԥысуа. Сзындаҭло аԥышәа ду имоуп, апрофессионалтә ринг аҿы 11-нтә дықәгылахьеит, 10-нтә аиааира игеит", - еиҭеиҳәоит Агрба.
Харитон Агрба актәи абжьаракапан – 63,5 кьыла аҟны дықәгылоит.
Апрофессионалтә ринг аҿы ахынтә раан Александр Подольски диндаҭлоит. Уаанӡатәиқәа ҩба рҿы иара даиааит.
Харитон Агрба – Урыстәыла еизгоу амилаҭтә команда далахәылоуп, 2019 шықәса рзы Киольн имҩаԥысуаз Адунеи ахраҿа аҟны араӡны медал ианашьоуп, 2019 шықәса рзы Минск имҩаԥысуаз Европатәи ахәмаррақәа рҟны араӡны медал иоуит, астудентцәа рыбжьара ҩынтәны адунеи дачемпионхахьеит. 2019 шықәса цәыббрамзазы Красноиарск имҩаԥысуаз Урыстәыла Аҩныҵҟатәи аусқәа рминистрра ачемпионат аҟны аиааира игеит.
Иара убас шәаԥхьар ҟалоит:
- Аԥсуа боксиор Харитон Агрба аҩбатәи аҭыԥ ааникылеит Европатәи ахәмаррақәа рҿы
-
Абоксиор Харитон Агрба кубатәи аолимпиатә чемпион иҟны аиааира игеит
