Аиааира, аҵахара, аиҭахара: аԥсуа спортсменцәа абокс ахәылԥазқәа рҿы ишықәгылаз

CC0 / / Бокс
Бокс - Sputnik Аҧсны
Анапаҵаҩра
Нанҳәа 22 рзы аԥсуа боксиорцәа Харитон Агрбеи Баҭал Ҷежьиеи Казан имҩаԥысуаз абокс ахәылԥаз "Столото. Вечер бокса WBC" аҟны иқәԥон, Игор Адлеиба иакәзар - Екатеринбургтәи аицлабра RCC Boxing Promotions аҟны.

АҞӘА, нанҳәа 23 - Sputnik. Аԥсуа спортсмен Харитон Агрба аӡбаҩцәа еицҿакны ишырыӡбаз ала, дииааит Сослан Тедеев ашоу "Столото. Вечер бокса WBC" аҟны асабша, нанҳәа 22 рзы, абри атәы аанацҳауеит Аԥсны Аспорт азы аҳәынҭқарратә еилакы. 

Егьи абоксиор, Баҭал Ҷежьиа аӡбаҩцәа изларӡбаз ала, аурыс спортсмен Сергеи Кожухар иҟны даҵахеит атитул WBC Youth азы реиндаҭлараҿы.

Абоксиортә шоу "Столото. Вечер бокса WBC" мҩаԥысуан Казан акультура-арлахҿыхратә комплекс "Пирамида" аҟны.

Игор Адлеиба Екатеринбург имҩаԥысуаз аицлабра RCC Boxing Promotions аҟны Кантемир Калажокови иареи еиҭахарала еилгеит.

Харитон Агрба - Европатәи ахәмаррақәа - 2019 аҟны араӡны даԥсахахьеит. Уажәы иара апрофессионалтә ринг аҟны аԥшьынтә раан даиааит. 

Баҭал Ҷежьиа - ИАРи Славиантәи атәылақәеи дырчемпионуп ажурнал "Про Бокс" аверсиала. Ҷежьиа даиааихьеит "Гладиаторы ринга" захьӡу Анапа имҩаԥысуаз абоксиортә шоу, Ростов-на-Дону имҩаԥысуаз апрофессионалтә бокс ахәылԥаз аҟны ареитингтә қәԥараҟны аиааира игеит, ИАРи Славиантәи атәылақәеи дырчемпионхеит ажурнал "Про Бокс" аверсиала.

Игор Адлеиба - WBO аверсиала аҿар рыбжьара адунеи дачемпионуп, Урыстәылатәи Афедерациаҟны имҩаԥысуа жәларбжьаратәи аицлабрақәа дыриааихьеит. Кикбоксинг азы (фул контакт) Адунеи ахраҿа даиааихьеит, абокс азы Аԥсны аспорт азҟаза, Урыстәыла аспорт азҟазарахь акандидат.

Ажәабжьқәа зегьы
0