АҞӘА, жәабран 5 - Sputnik, Сариа Кәарцхьиаԥҳа. Ааԥынразы ақыҭанхамҩаалыҵ ԥхазҭазтәуа рҿагыларазы ауснагӡатәқәа ирылагоит ҳәа иҳәеит Sputnik акорреспондент дзыҿцәажәоз Ақыҭанхамҩа аминистр Беслан Џьопуа.
Аԥсны иазыԥхьагәаҭоуп аҿагыларатә уснагӡатәқәа рымҩаԥгара, аминистрра аҵиаақәа рыхьчаразы Амаҵзура аҟазауаа аҭагылазаашьа ҭырҵаауеит. Ҭагалан азы иазыԥхьагәаҭоуп амармалташь пты аизгара.
"Усқәак нап дуркаанӡа аҭагылазаашьа ҭҵаалатәуп. Уи мҩаԥнагоит аминистрра аҵиаақәа рыхьчаразы Амаҵзура. Амаҵзура аҟазауаа араионқәа рахь инеиуеит аҭагылазаашьа зеиԥшроу абаразы. Урҭ рабжьгажәақәа ҳарзыԥшуп. Ирҳәо ҳацныҟәаны ауснагӡатәқәа еиҿаҳкаауеит", - иҳәеит Џьопуа.
Аԥсны ақыҭанхамҩа аминистрра Урыстәыла ақыҭанхамҩа аминистрра иазынанашьҭит 2021 шықәсазы амармалташь пты аҿагыларазы аныхрақәа рхарџьнҵа.
"Урыстәыла ақыҭанхамҩа аминистрра иазынаҳашьҭит 2021 шықәсазы амармалташь пты аҿагыларазы аныхрақәа рысмета. Дара уи ҭҵааны ауснагӡатәқәа ҳәаақәырҵоит. Ацхыраара ҟарҵап ҳәа ҳақәгәыӷуеит. Усеиԥш акәымхаргьы аԥаразоужьра мҩаԥаагароуп. Уи макьана еилкаам заҟа аҭаххо", - иҳәеит аминистр, иагьазгәеиҭеит ҵыԥх иаахәаз ахәшәқәа рцәынха шыҟоу.
2020 шықәсазы Урыстәыла 130 миллион инеиҳаны абри аус иахҭыннаҵеит.
Беслан Џьопуа иажәақәа рыла арҭ аԥарақәа рыла иаахәан апестицидқәа, ахәшәқәҭәага аппаратқәа, атехника ҷыда, авиациа ахархәарала ахәшәқәҭәара. Ацхыраара ҟаҵан жәларбжьаратә еиҿкаарақәа рҟынтәгьы. Аминистрра абиуџьет аҟынтәгьы 15 миллион мааҭ ныхын.
2020 шықәсазы амармалташь пты анырҵәаразы 400 000 тонна апестицидқәа аахәан.
Апты аиҳарак иҟан Гали Очамчыреи араионқәа рҿы, еиҳа имаҷын Тҟәарчали Гәылрыԥшьи араионқәа рҿы. Аҭагылазаашьа еиҳа еиӷьын атәыла мраҭашәаратәи ахәҭаҿы.
Аминистр иҳәеит имҩаԥгаз ауснагӡатәқәа ирылыршаны 2020 шықәсазы аҽаҩра бзиа ыҟан.
Џьопуа иҳәеит апты зегь ықәҵаанӡа аҿагыларатә уснагӡатәқәа мҩаԥгалатәуп ҳәа.
