АҞӘА, жәабран 6-Sputnik. Аԥсны ахада Аслан Бжьаниа имшира идиныҳәалеит Аахыҵ Уаԥстәыла ахада Анатоли Бибилов. Абри атәы аанацҳауеит ахада иофициалтә саит.
Аахыҵ Уаԥстәыла ахада 51 шықәса ихыҵит.
"Ҳаҭыр зқәу Анатоли Илиа-иԥа! Аԥсны жәлар рыхьӡалеи хаҭала сыхьӡалеи шәирамш шәыдысныҳәалоит. Шәара аҳәынҭқарратә усзуҩуп, шәыԥсҭазараа зегьы шәыԥсадгьыл амаҵ азуреи, ахьыԥшымра арӷәӷәареи, аҳәынҭқарратә усбарҭақәа рырҿиареи иазышәкит", - ҳәа аҳәоит адныҳәалараҿы.
Бжьаниа иазгәеиҭеит Бибилов Аԥсны ҳаҭырла ишизыҟоу, аполитикатә усзуҩ иаҳасабала, аиашьаратә республикақәа рыбжьара аимабзиара арӷәӷәараҿы илагалазы.
Аԥсны ахада иколлега изеиӷьеишьеит агәабзиара ӷәӷәеи ақәҿиарақәеи.
