"Хра злоу ахҭысқәа": Қәҭарба амҳаџьырра иазкны
"Сара ахҵәара зхызгаз амилаҭқәа егьырҭ ҳазлареиԥшым алкааны исымоуп. Ҳара ҳаиԥш ахҵәара зықәшәаз амилаҭқәа рхәыҷқәа анырааӡо ажәабжь бааԥсқәа рзеиҭарҳәоит, изықәшәаз рхамышҭырцаз. Аха ухәыҷы ус даныуааӡо — дшәыргәындахоит. Ҳабацәа ҳара ус ҳзырмуит. Иҳарҳәоз амилаҭқәа зегьы еиҟароуп, аха шәара шәаԥсыуаауп, шәаԥсуара анышәхашҭ зегьы шәцәыӡуеит ҳәа ҳарҳәон. Дара амсылман динхаҵара ныҟәырго иалагеит, аха аԥсуара иреиҳаӡоу динны ирыԥхьаӡон. Убри ауп ассимилиациа аҟнытә ҳзыхьчаз", — азгәеиҭеит Қәҭарба арадио Sputnik Аԥсны аефир аҟны.
