АҞӘА, мшаԥы 13 - Sputnik. Иааиуа амчыбжьқәа акоронавирус аҿагылараҿы хра змоу ракәны, аҭагылазаашьа азыԥхьагәазҭо мчыбжьқәаны иҟалоит ҳәа иҳәеит Урыстәыла ахада Владимир Путин мшаԥы 13 рзы ателеканал "Россия 24" ала иддырбоз атәылаҿ иҟоу асанитар-епидемиологиатә ҭагылазаашьазы аусутә еилацәажәара амҩаԥгараан.
"Иааиуа амчыбжьқәа зегь рҭыԥ иқәырҵароуп. Ус анакәха, иҟаҳҵо зегь аоптималтә ҟазшьа рыманы иҟазароуп, иҟалар зылшогьы азыԥхьагәаҳҭалароуп", - ҳәа иҳәеит иара аилацәажәараҿы.
Атәыла ахада ишазгәеиҭаз ала, Урыстәыла аҩнуҵҟа акоронавирустә ҭагылазаашьа есҽны аҽеиҭанакуеит, ирацәоуп ачымазара хьанҭаны изхызго.
Убри аан иара иҳәеит шьаҿак ԥхьаҟа агылара алшаны иҟоуп, аха ԥхьаҟагьы усеиԥш иҟазарц азы апрофессионалтә зыԥхьагәаҭара хымԥадатәны иҟоуп ҳәа.
Путин аиҳабыра рнапы ианиҵеит есҽны адыррақәа иҭалазарц.
Иҟаҵан анапынҵа аҳәынҭқарратә резерв аԥҵаразы иаку аахәаратә центр аиҿкаараз.
Урыстәыла ахада иҳәеит амедицинатә усзуҩцәа хымԥада ашәара цҵақәа роуроуп, иара убасгьы ахаҭатә хьчагақәа рыла еиқәыршәалатәуп ҳәа.
Иара убасгьы Путин иазгәеиҭеит Атәылахьчара аминистрра ацхыраара аҭаххоит ҳәа.
Иахьазы Урыстәыла 18 328-ҩык акоронавирустә инфекциа рымоуп.
Акоронавирус иазку аҵыхәтәантәи адыррақәа шәоур ҟалоит абра>>
