АҞӘА, абҵ 26 – Sputnik. Аконституциа аиӷьтәра Аԥсны ахадаразы ихадоу ахырхарҭақәа иреиуоуп, иҳәеит Рауль Ҳаџьымба Аԥсны Аконституциа ҩажәашықәса ахыҵра иазкыз Аминистрцәа Реилазаараҿы имҩаԥгаз аныҳәатә еизараҿы иқәгылара аан.
"Хара имгакәа снапы аҵазыҩуеит ақәҵара аконституциатә реформақәа рзы акомиссиа аиҿкааразы. Уи аусура иадԥхьалахоит аконституциатә реформақәа рзы аспециалистцәа, ауаажәлар рхаҭарнакцәа", — иҳәеит Аҳәынҭқарра Ахада.
Рауль Ҳаџьымба игәаанагарала, акомиссиа аусура ахырхарҭа хадақәа ируакхар ауп Аҳәынҭқарра амчра амахәҭақәа иҭышәынтәаланы рыҟаҵара.
Аҳәынҭқарра Ахада игәаанагарала Аконституциа иҳәаақәнаҵозар ауп ауаажәлар ԥхьаҟатәи рԥеиԥш.
