АҞӘА, ажь 16 – Sputnik, Саид Барганџьиа. Риҵатәи амилаҭтә ҳәырԥсарра аиҳабы Рита Лоуа лажәақәа рыла, уи ахашәала аизҳара анапхгара асистема аԥсахра иадҳәалоуп.
"Еиҿҳарԥшуазар, 2014 шықәса ажьырныҳәамзазы 21 нызқь мааҭ ахашәалеит, иааидкыланы 2014 шықәсазы 61 миллион мааҭ", – лҳәеит апарк аиҳабы.
Аусзуҩцәа рыбжеиҳараҩык ҿыцуп. Амилаҭтә парк авидеохылаԥшратә система ала еиқәыршәоуп. Уи аусзуцәа руалафахәы 30% рыла ишьҭырхит, лҳәеит Лолуа.
Апарк аҟны уаанӡа имҩаԥгаз аусураҿы аилагарақәа рацәаны ицәырган.
"Ишьақәыргылаз абилеҭқәа ишаҭаху рыҭира аԥҟарақәа рықәымныҟәара, апарк аҭааҩцәа билеҭда рынашьҭра, хыԥхьаӡарарацәала абилеҭқәа реиҭаҭира», – лҳәеит апарк аиҳабы.
"Аԥсны Аҳәынҭқарра аиҳабыра 2015 шықәса апарк азы ишьақәнаргылахьеит аплан, 120 миллион мааҭ аԥара азоужьуп. Акурорттә сезон иманшәаланы иаҳхысыр, аплан нагӡахоит", – лҳәеит Рита ЛОлуа.
Рита Лолуа Риҵатәи амилаҭтә ҳәырԥсарра еиҳабыс даҭан 2014 шықәса абҵарамзазы, уи лаԥхьа еиҳабыс Саид Ҭаркьыл дыҟан.
