ГАГРА, хәжәк — Sputnik, Саида Жьиԥҳа. Акциа актәи аухазы ацхыраара ласы ҩынтә иаԥхьеит, аҳақьым-афельдшер ҩыџьа аҳәсацәа ргәабзиара уашәшәырахеит ҳәа азгәалҭеит. Абри атәы аалыцҳауеит аҭыԥан иҟоу Sputnik акорреспондент.
"Сара ирабжьызгеит иҳацны ахәышәтәырҭахь иааларц, уа ишьҭаларц, аха дара ҩырала ажәа ҟарҵеит ахәышәтәырҭаҿы ашьҭалара мап шацәыркуа. Сара сганахьала раԥхьатәи ацхыраара рысҭеит. Ҩыџьа аҳәсақәа ршьақәыӷәӷәара акырӡа халеит, урҭ агәырқәа рзыҟасҵеит. Егьырҭ акциа алахәцәа ргәалаҟазаара хар амам", — лҳәеит гагратәи ахәышәтәырҭа афельшер Галина Борцова.
Апротесттә акциа алахәцәа амлакра иаҟәыҵырц ргәы иҭаӡам.
"Ҳдиректор ари акциа шәаҟәыҵ ҳәа ҳаиҳәеит, аха ҳара ҳус аҵыхәтәанынӡа инаҳаӷӡоит", — рҳәеит "Континент" аусзуҩцәа.
Акциа алахәыла Александр Кузнецов иажәақәа рыла, акциа алахәцәа ирҭааит амилициеи ашәарҭадаратә маҵзуреи рхаҭарнакцәа, акциа иалахәу рхыԥхьаӡареи урҭ хықәкыс ирымоуи рзы адыррақәа ргеит, аха аҭыԥантәи амчрақәа рҟынтә макьана анырра ҳәа акгьы ыҟам.
