АҞӘА, лаҵ 13 – Sputnik. Аԥсны аекономика аминистр иқәҵарала, аҳәынҭқарратә ргыларатә еилахәыра "Аԥсныргылара" аиҳаб ҿыцс дҟарҵоуп Игор Казанба. Абри атәы ааицҳаит аекономика аминистрра апресс-маӡаныҟәгаҩ Гьаргь Берзениа.
Берзениа иажәақәа рыла, аекономика аминистр аҳәынҭқарратә еилахәыра "Аԥсныргылара" аусзуҩцәа иҭабуп ҳәа реиҳәеит, уаанӡатәи ахада Руслан Тәанба ихаантәи русуразы.
"Аиашазы, шәусура даара аџьабаа ацын, аха шәусура алҵшәақәа амоуп. Аиҳабыра ахә ҳаракны иршьоит ԥасатәи аиҳабы инапхгарала имҩаԥгаз аусура", — азгәеиҭеит Адгәыр Арӡынба.
Аилахәыра уаанӡатәи аиҳабы Руслан Тәанба Аԥсны аргылара аусбарҭа ахада ихаҭыԥуаҩс дҟаҵоуп.
Игор Казанба диит мшаԥымза 8, 1959 шықәсазы Казахстан. Казанба занааҭла данџьныр-ргылаҩуп.
