АҞӘА, рашә 3 — Sputnik, Наала Аҩӡԥҳпа. Аԥсны Ахада Рауль Ҳаџьымба Аминистрцәа Реилазаарахь адҵа ҟаиҵеит ҩы-мчыбжь ирҭагӡаны акадртә еилазаашьа аиӷьтәразы ажәалагалақәа еиқәдыршәарц.
"Уи аус ҩы-мчыбжь ирҭагӡаны иҟаҵазароуп, еиҳамкәа. Аԥыза-министр, аԥыза-министр ихаҭыԥуаҩ, егьырҭ аминистрцәагьы уи аусура активла рхы аладырхәырц адҵа рысҭоит. Урҭ аусқәа аҭахуижьҭеи акырҵуан. Иахьа уи амҩа ҳақәымлар ада ԥсыхәа ҳамам", – иҳәеит ахада.
Рауль Ҳаџьымба аҳәынҭқарратә усбарҭақәа рыштатә хыԥхьаӡара 15% рҟынӡа ирмаҷзароуп ҳәа азгәеиҭеит.
"Даҽа мҩак ыҟаӡам. Шәыштаттә хыԥхьаӡара 15% рҟынӡа ишәыркьаҿроуп. Иҟоуп аҳәынҭқарратә усбарҭақәа рҟны еиԥшу амаҵурақәа ахьуԥылогьы. Ари еиԥш аҭагылазаашьа, ҳәарада, иаԥыхтәуп. Иҳауои иҳарҳауои афинансқәа ҳреиҷаҳалароуп", – иазгәеиҭеит Ҳаџьымба.
Аштаттә хыԥхьаӡара армаҷра аҳәынҭқарра аусбарҭақәа зегьы ирхьысуеит, Ахада иусбарҭеи, Аминистрцәа Реилазаареи уахь иналаҵаны, ҳәа ациҵеит Ҳаџьымба.
"Уи зыҟаҳҵо аӡәы ҳирҽхәарц азакәӡам. Ҳҳәынҭқарразы ихәарҭазаауеит, иҳамоу аԥара хылаҵәҟьа, пату ақәҵаны ашьҭразоуп. Ҳәарада уи ҳусура ахаҭабзиарагьы еизәнарҳауеит», – иазгәеиҭеит ахада.
Аԥыза министр Артиом Амкуаб ишиҳәаз ала аминистрцәа реилазаара арҿыцрақәа ирызхиоуп, иара убас иациҵеит ҩымчыбжь – ахада ириҭаз адҵа анагӡаразы иазхо ҿҳәароуп ҳәа.
"Аусԥҟахара имгакәа еиқәҳаршәоит. Убри инақәыршәаны, иаҭаху аусқәа еиҿаҳкаауеит. Сгәаанагарала, уи ҳусураҟны иҳахәоит", – иҳәеит Амқәаб.
Аԥыза-министр иажәақәа рыла, аминистррақәак русзуҩцәа еиуеиԥшым афункциақәа еицынарыгӡалар рылшоит.
