АҞӘА, нанҳәа 11 — Sputnik, Бадраҟ Аҩӡба. Донецктәи жәлар рреспублика аҟынтәи аспортсменцәа ҿарацәа алахәхоит аҩаша, нанҳәа 11 рзы иаадыртуа алагер "Азбука безопасности и выживания – 2015".
"Ҩымчыбжьа инарзынаҧшуа азыҟаҵаҩцәеи, АҶА ахаҭарнакцәеи, амчратә еилазаарақәа рхаҭарнакцәеи аспортсменцәа ҿарацәеи алахәхоит ашьапылампыл, абокс, аиқәҧара уҳәа реиҧш иҟоу аиндаҭларақәа, имҩаҧыргоит арра-спорттә зыҟаҵарақәа, амшын аҟны рҽыркәабоит, рыҧсы ршьоит", — иҳәеит аиҿкааҩцәа ируаӡәку, Урыстәылатәи афонд "Наш дом" ахантәаҩы Артиом Артиомов.
Иара иазгәеиҭеит ДНР аҟынтәи ахәыҷқәа ишырзаҧҵахо иреиҕьу аҭагылазаашьақәа анхаразы.
"Ақыҭанхамҩатә раионқәа адгылара ҳарҭарц ҳақәдыргәыҕит, ахәыҷқәа ирзаарышьҭлоит ашәыр, аргәыц. Адепутатцәагьы ахәыҷқәа хылаҧшрада инрыжьуам", — азгәеиҭеит Артиомов.
Арра-патриоттә лагер "Азбука безопасности и выживания – 2015" еиҿкаауп Донбасс аветеранцәа Рхеилак "Беркут", ауаажәларратә республикатә Ҵысра "Свободный Донбасс", ДНР аҿари, аспорти, атуризми русқәа рзы Аилак раҧшьгарала, Аҧсны абаҩрҵәыреи аспорти рзы Аилак адгыларала.
Аспорттә, арра-патриоттә лагер "Азбука безопасности и выживания – 2015" мҩаҧысуеит нанҳәа 11-25 рзы.
