АҞӘА, цәыббра 11 — Sputnik, Сырма Ашәԥҳа. "Жәларбжьаратәи афонд Аԥсны" ахада Сенер Гогәуеи, Аԥсны аҵареи аҭҵаарадырреи рминистр Адгәыр Какобеи, Адаԥазар иҟоу аԥсуаа ркультуратә хеидкыла аиҳабы Орал Бганбеи, Сақариа агубернатор Хәсеин Авни Џьошь идикылеит.
Аԥснытәи аделегациа, агубернатори аҭырқәа жәлари ирыдышшылеит, аҵыхәтәантәи аамҭазы Ҭырқәтәыла имҩаԥысуа атерракт иахҟьаны аруаа рыԥсҭазаара иахьалҵуа. Иара убас, агубернатор инарҭбааны изеиҭарҳәеит Аԥсны асоциал-економика, атуризм, акультура, аҵарадырра уҳәа ҳтәыла зну аҿиара мҩа зеиԥшроу.
Аԥсны аҵареи аҭҵаарадырреи рминистр Адгәыр Какоба агубернатор даара ҭабуп ҳәа иеиҳәеит Сақариатәи иреиҳау аҵараиурҭақәа рҟны Аԥснынтә аҵара зҵо астудентцәа рахь иаадырԥшуа ахаҵгыларазы. Ҳтәыла Аҳәынҭқарра ахада Рауль Ҳаџьымба ихьӡала асалам ианеишьеит. Иара убас, Адгәыр Какоба, агубернатор ҳамҭас ахьтәы ԥсар ианашьауа, Аԥсныҟа ааԥхьара ииҭеит.
Уи гәахәала идкылауа, Сақариатәи агубернатор Хәсеин Авни Џьошь иҳәеит, аамҭа ԥшааны, дук хара имгакәа Аԥсынтәыла даҭаарц шиҭахыу. Агубернатор Адгәыр Какоба ианеишьеит ҷыдала инапыҟаҵароу ашәҭҭра.