АҞӘА, цәыббра 18 — Sputnik. Хорватиа анапхгара, Хорватиеи Сербиеи рҳәаахь уназго автомагистральқәа зегь рҟны амҩақәа адыркит ҳәа аанцҳауеит агентра Реитер, аҭыԥантәи аполициа ринформациа ҵаҵӷәыс иҟаҵаны.
"Аныҟәара аанкылахоит аиҳабыратә мчрақәа ԥхьаҟатәи рықәҵарақәа рҟынӡа", — аҳәоит аҳәамҭаҟны.
Аныҟәара хаҭала иаанкылоуп аҳәаахысырҭа Товарник аҟны. Уантәи ауп ахҵәацәа реиҳараҩык Сербиантәи Хорватиа аҵакырадгьыл ахь иахьынтәиасуаз.
Аполициа иҟарҵо адыррақәа рыла, ахаша аахыс Хорватиаҟа иаахьеит 11 000-ҩык ахҵәацәа.
Уаанӡа, аԥшьашаҽны, Хорватиа Аҩныҵҟатәи аусқәа рминистр Ранко Остоич иҳәеит, итәыла Сербиеи иареи рыбжьара аҳәаа анаркырц шагәиҭоу, уахыки-ҽнаки ала ииасуа ахҵәацәа рхыԥхьаӡара быжьнызқьҩык иреиҳахар. Ареспублика Аҩныҵҟатәи аусқәа рминистр иара убасгьы иазгәеиҭеит атәыла ишамам алшара ариаҟара ахҵәацәа рыдкыларазы.
2015 шықәса алагамҭа инаркны Евроеидгыла аҵакырахь иаахьеит 500 000-ҩык ахҵәацәа, еиҳа-еиҳагьы рхыԥхьаӡара ацлара иаҿуп. Еврокомиссиа аҳәамҭа ҟанаҵеит ҳаамҭазтәи амиграциатә кризис Аҩбатәи адунеизегьтәи аибашьра аахыс зегь иреиҳау акәны иҟоуп ҳәа. Иара ажәалагала инақәыршәаны ЕС атәылақәа иааиуа аҩышықәса рыҩныҵҟа рҵакырадгьылқәа рҟны 160 000-ҩык рҟынӡа ахҵәацәа рыдыркылароуп.
