АҞӘА, цәыббра 22 — Sputnik, Бадраҟ Аҩӡба. Ареспубликатә унитартә наплакы "Аԥснычаи" адиректор Асҭамыр Оҭырба иганахьала ашьаус хацркуп Аҩныҵҟатәи аусқәа рминистрра арапорт ала. Аминистрра — Аԥсны Ашьаустә кодекс ахәҭаҷ 124 (ацәаԥҽра) инақәыршәаны, Оҭырба иажәақәа Аԥыза-министр Артур Амқәаб иганахьала ацәгьоура рыҵнабааит.
Аԥсны Аҩныҵҟатәи аусқәа рминистр ихаҭыԥуаҩ Виачеслав Ҟәырасқәуа иҳәеит: Аԥыза-министр Артур Амқәаб ААР (МВД) ахь арзаҳал неимышьҭит АУН (РУП) "Аԥснычаи" адиректор Асҭамыр Оҭырба иганахьала ҳәа.
"Аҩныҵҟатәи аусқәа рминистрра аусзуҩцәа азинмчра рымоуп ацәгьоура аҟазшьақәа ыҟоуп ҳәа ахьазгәарҭаз, иарбанызаалак аҭагылазаашьаҟны ашьаус хдыртырц уи азы арзаҳал ыҟамзаргьы", — ҳәа азгәеиҭеит аминистр ихаҭыԥуаҩ.
Ҟәырасқәуа инаҵшьны иазгәеиҭеит наҟ-наҟтәи аҭҵааразы ашьаус шынашьҭу Аҩныҵҟатәи аусқәа рминистрра Аусҭҵааратә усбарҭахь.
Аԥсны Ашьаустә кодекс ахәҭаҷ 124 (ахьӡ аҭара) инақәыршәаны аӡбарҭа аӡбра иазыԥхьагәанаҭоит ахараԥса: 20 000 инаркны 40 000 мааҭ рҟынӡа, мамзаргьы шықәсык инаркны ҩышықәсанӡа аҽыриашаратә усурақәа, ма — хышықәса рҟынӡа ахақәиҭра алхәыдатәра.
Аԥсны Апрокуратура хада цәыббра 17 рзы Ареспубликатә унитартә наплакы "Аԥснычаи" адиректор Асҭамыр Оҭырба иганахьала ашьаус хацнаркит.
Ареспубликатә унитартә наплакы "Аԥснычаи" адиректор Асҭамыр Оҭырба, 2015 шықәса цәыббра 7 рзы, апресс-конференциаҟны аҳәамҭа ҟаиҵеит Аԥсны Аԥыза-министр Артур Амқәаб иҟоу апроблемақәа рыӡбра ацхыраара аҭаразы "Аԥснычаи" ахашәалахәқәа рыхәҭак аиура иҭаххеит ҳәа.
